Бэҕэһээ Мэҥэ Хаҥаласка кыбаарталга саҥа модульнай гаас хочуолунайа үлэҕэ киирбитин бэлиэтээтилэр. Аныгылыы ирдэбилгэ эппиэттэһэр, сонун технологияларынан хааччыллыбыт эбийиэк федеральнай тус сыаллаах тыа сирин биир кэлимник сайыннарыы бырагыраама чэрчитинэн үбүлэннэ. Маннык бырагырааманан Арассыыйаҕа алта нэһилиэк хааччыллыбыт, онтон биирдэстэрэ ‒ Саха сиригэр Хара нэһилиэгин Үрдьүҥэхтээх кыбаартала буолла.
Саҥа хочуолунай номнуо таҥыллан, Үрдьүҥэхтээххэ сотору кэминэн үлэҕэ киириэхтээх оҕо саадын саҥа таас дьиэтин итиинэн хааччыйа турар. Тэрээһиҥҥэ «Электромонтаж» хампаанньа салайааччыта Василий Пинигин, оройуон баһылыгын солбуйааччы Александр Тарасов, нэһилиэк баһылыга Дария Назарова о.д.а. саҥа тутуу лиэнтэтин быстылар.
‒ Кэккэ сылларга биһиги нэһилиэкпитигэр өтөрүнэн ыытыллыбатах бөдөҥ тутуулар биир кэлимник бардылар. Саҥа модульнай хочуолунай Германияттан аҕалыллыбыт икки хочуоллардаах, ураты таҥыллыылаах, 4 мегабатт кыамталаах. Саха сиригэр соҕотох хочуолунай быһыытынан сыаналанна. Таҥмыт тэрилтэ үлэһиттэрэ ону бигэргэтэллэр. Бүтүн кыбаарталы хааччыйар кыахтаах хочуолунай аныгы кэм технологиятынан толору сэбилэммит. Онон салгыы саҥа оскуоланы, уопсай дьиэлэри тутууну туруорсан, олоххо киллэрэн иһэргэ былааннанабыт, ‒ диэтэ Дария Назарова уонна Василий Пинигиҥҥэ Хара нэһилиэгин социальнай-экономическай сайдыытыгар кылаатын иһин анал бэлиэни туттарда.
Василий Иннокентьевич хочуолунай уратыларын сырдатта. Анал температураны көрдөрөр, сииги кыраҕытык кэтиир, автоматиканан сэбилэммит прибордарынан, оһохтор үлэлэрин, систиэмэ көмпүүтэринэн хааччыллыбытын кэпсээтэ. Гаас ситимэ арахсар түгэнигэр үс туонна сэлээркэнэн хааччынан уһун кэмҥэ сылааһы тохтообокко биэрэр кыахтаах. Сатабыллаах, эппиэтинэстээх эдэр үлэһиттэр харыстаан уһуннук, сылаастык үлэлэтэллэригэр баҕа санаатын тиэртэ. Хочуолунай салгыы «Коммунтехсервис» тэрилтэ бас билиитигэр бэрилиннэ.
Ааптар: Марфа ПТИЦЫНА
This post was published on 20.12.2018 19:45 19:45