Олус хомолтолоох соһумар быһылаан кулун тутар 3 күнүгэр Мэҥэ Хаҥалас улууһун Хаптаҕай сэлиэнньэтигэр таҕыста.
РФ Силиэстийэлиир кэмитиэтин Саха сиринээҕи управлениета иһитиннэрбитинэн, бу дьыл кулун тутар 3 күнүгэр Хаптаҕай сэлиэнньэтин биир дьиэтигэр икки оҕо — 10 саастаах уол уонна 14 саастаах кыыс — өлүктэрэ көстүбүт. Силиэстийэ сабаҕалыырынан, оҕолор гаастан үгээрдээн өлбүттэр.
Барыллаан быһаарыынан, ити күн ыал аҕата табаарыһын кытта балыктыы барбыттар, ойоҕо үс оҕотун кытта дьиэҕэ хаалбыттар.
Ыалдьыттара — дьиэлээх хаһаайын табаарыһа — «Тойота Кроун» массыынатын гарааска туруорбут, гараас буоллар, дьиэҕэ сыста тутуллубут. Онуоха бу киһи массыынатын температура -5 кыраадыска диэри тымныйдаҕына, бэйэтэ собуоттанан кэлэрин гына туруоран барбыт. Ол эбэтэр, массыына сылыйбытын кэнниттэн двигателэ бэйэтэ арахсыахтаах эбит.
Сарсыныгар, кулун тутар 4 күнүгэр, аҕалара күнүс балыктаан кэлбитэ — дьиэ аана иһиттэн хатааһыннаах, икки оҕото өлөн сытаахтыыллар, оттон ойоҕун кытта 8 саастаах уолчаана эмиэ үгээрдээннэр, балыыһаҕа киллэриллибиттэр. Табаарыһын массыыната гарааска сол курдук собуоттанан турар эбит.
Билигин бу чахчынан силиэстийэ уорганнара процессуальнай бэрэбиэркэ ыыталлар. Өлүүнү аҕалбыт массыынаны экспертизаҕа ылбыттар.
Бэрэбиэркэ түмүгүнэн, процессуальнай уураах тахсыаҕа.
