Нам улууһун Хамаҕаттан нэһилиэгин олохтоохторо Ивановтар дьиэ кэргэн саҕалыыр фермердэри өйүүр граҥҥа быйыл тиксибиттэрэ. Граннарын үбүгэр-харчытыгар кинилэр 50 төбөҕө анаммыт хотону туттулар.
Быйыл 30 төбө сүөһү кыстыаҕа, ону таһынан сибиинньэлээхтэр, кууруссалаахтар. Ити туһунан тыа хаһаайыстыбатын уонна ас-үөл бэлиитикэтин министиэристибэтин пресс-сулууспата иһитиннэрэр.
«Грант үбүгэр-харчытыгар былааннаабыппыт курдук, биэс ыанар ынаҕы ыллыбыт. Үп-харчы баһыйар үксэ хотону тутууга ороскуоттанна. Кыстыкка 45 тонна оту бэлэмнээтибит, эбии комбикорм ыллыбыт. Инникитин автодойка туруораммыт үүтү туттарар былааннаахпыт. Ыанар ынахтарга сенаж, сиилэс сиэтиэхпит. Ити түмүгэр элбэх үүтү ыахпыт дии саныыбыт. Оччотугар дохуоппут да үрдүө. Саҕалааччы фермердэри өйүүр федеральнай бырагыраама хаһаайыстыбаны сайыннарарга олугу уурда», — диэн Ульяна Иванова кэпсиир.
