Бүгүн, ыам ыйын 20 күнүгэр, тутуу министиэристибэтин иһинэн үлэлиир «СӨ судаарыстыбаннай сакаас сулууспата» тэрилтэ бэрэстэбиитэллэрэ Нам улууһугар сырыттылар. Тутуу хайдах баран иһэрин көрдүлэр-билистилэр, инники былааны торумнастылар.
Нам улууһун баһылыга Юрий Слепцов оройуоҥҥа ыытыллар тутууга эппиэттээх сирэйдэри кытта Дьокуускайтан кэлбит бөлөҕү тутуу буолар сирдэригэр сырытыннарда, балаһыанньаны билиһиннэрдэ.
Хамаҕаттаҕа интернаттаах 220 миэстэлээх оскуола тутуллар. Билиҥҥитэ 11 киһи үлэлии сылдьар, бу нэдиэлэҕэ өссө 13 исписэлиис эбии кэлиэхтээх. Бары медицинскэй көрүүнү ааспыттар. Коронавирус дьаҥыттан сылтаан, графиктан кыратык хаалыы баар, ону ситэргэ сыал-сорук турар.
Аппааныга тутуллуохтаах икки этээстээх таас култуура дьиэтин сыбаайатын көрдүлэр. Куонкурус түмүгүнэн бэдэрээтчитинэн «СТК» ХЭТ буолла. Бу күннэргэ тахсан, үлэтин саҕалыахтаах.
Хамаҕатта уонна Хатыҥ Арыы олохтоохторо өр сылларга туруулаһан туруорсубут баҕалара сотору кэминэн олоххо киирэригэр эрэллээхтэр, диэн СИА-ҕа иһитиннэрдэ «Нам улууһа» МТ пресс-сулууспата.
Бөлөххө үлэлээтилэр техническэй отделын начальнига Константин Хойутанов, сулууспа техническэй отделын сүрүннүүр инженерэ Евдокия Александрова, инженернэй отдел сүрүннүүр инженерэ Андрей Макаров, «Туйгун» ХЭТ бэрэстэбиитэлэ Айгылаан Андреев, «Стройтехнология» ХЭТ дириэктэрэ Ривас Прокопьев, улуустааҕы тутуу уонна архитектура управлениетын начальнига Петр Эверстов, Хамаҕатта нэһилиэгин баһылыга Иван Максимов, Хатыҥ Арыы нэһилиэгин баһылыга Иван Ноговицын, «Чороон» КК дириэктэрэ Саргылана Пономарева.
