Муус устар 4 күнүгэр Дьокуускайга, “Юность” стадиоҥҥа хайыһарга Олимпийскай оонньуулар кыайыылаахтара (Ванкувер, 2010с.), үрүҥ көмүс призердара (Сочи, 2014 с.), аан дойду үс төгүллээх чөмпүйүөнэ, Арассыыйа спордун үтүөлээх маастара Никита Крюков кыттыылаах хамаанданан сприҥҥэ “Гонка звезд” күрэхтэһии буолла.
Үтүө үгэскэ кубулуйан төрдүс сылын ыытыллыбыт куоталаһыыга ааттаах-суоллаах спортсмены кытта Саха сирин күүстээх хайыһардьыттара илин-кэлин түһүстүлэр.
Көһүтүллүбүтүн курдук, биирдиитэ 700 м уһуннаах алта түһүмэхтээх куоталаһыыга уон икки паара күүһүн холоспутуттан, Никита Крюков уонна Мэҥэ Хаҥалас кэскиллээх эдэр хайыһардьыта Николай Зыков сырсааччыларыттан балайда атан биэтэккэ бастакынан элээрэн кэллилэр. Шестаков Никита (Амма), Петр Тайшин (Дьокуускай) иккис көрдөрүүлэннилэр. Григорьев Федор (Хаҥалас), Дегесов Антон (Ленскэй) үһүс бириистээх миэстэҕэ таҕыстылар.
Маны сэргэ 12-гэр диэри саастаах кыргыттар, уолаттар туһааннааҕынан 400 уонна 700 м эмиэ сприҥҥэ куоталаһыылара буолла.
Кыргыттарга бириистээх миэстэлэри Михайлова Айыы Куо (Хатас, 1 мүн. 54 сөк.), Алексеева Альберта (Хаҥалас, 2 мүн. 08 сөк.), Винокурова Сахаайа (Мэҥэ Хаҥалас, 2 мүн. 10 сөк.) ыллылар. Уолаттарга Гаврильев Харысхан (Хатас, 2 мүн. 15 сөк.), Терешкин Айтал (Уус Алдан, 2 мүн 16 сөк.), Гоголев Арсен (Хаҥалас, 2 мүн 29 сөк.) үс бастыҥ бириэмэни көрдөрдүлэр.
Куоталаһыы туһунан сиһилии “Саха сирэ” хаһыат кэлэр нүөмэригэр ааҕаарыҥ.
