19 Кулун тутар 19.03
  • -7°
  • $ 91,98
  • 100,24

Хайалаах Кавказтан Магадаҥҥа дьулуспаттар

15:55, 27 февраля 2017
Текст:
Читайте нас на
Яндекс Новости
ЯДВ

Олунньу саҕаланыаҕыттан “Уһук Илиҥҥи гектары” ыларга дойду 85 регионуттан 30 тыһыынчаттан тахса сайабылыанньа киирдэ. Сүрүннээн, Москва, Ленинград уобалаһын, Краснодар кыраайын, Санкт-Петербург, Калининград, Уфа, Екатеринбург уонна Новосибирскай куораттар олохтоохторо сирдэниэхтэрин баҕараллар эбит. Омук дойдуларыгар олорор Арассыыйа гражданнара эмиэ интэриэһиргииллэрин биллэрбиттэр диэн edersaas.ru таҕыста.


Оттон Кавказтан Уһук Илиҥҥэ босхо учаастак быстаран ылыан баҕалаах аҕыйах, суоҕун тэҥэ эбит. Бу төһө эмэ региоҥҥа үлэтэ суох киһи ахсаана элбэҕин үрдүнэн. Ол туһунан “Российская газета” суруйар.

Үгүстэр Уһук Илин ырааҕыттан саллаллар эбит. Холобура, Грознайтан Магадаҥҥа диэри 11 тыһыынча биэрэстэ. Итиччэ ыраах сиргэ бүтүн дьиэ кэргэнинэн көһөн барыы элбэх кыһалҕалардаах буолуоҕа сэрэйиллэр.

Ол иһин буолуо, Дагестаҥҥа Кадастр палаататыгар биир эрэ киһи кэлэн “гектар” бырагырааматын туһунан ыйыталаспыт. Атыттар төлөпүөннэһэн сирдэрин биэс сыл устата туһаҕа таһаардахтарына эрэ бас билиигэ ылыахтарын сөбүн биллэхтэринэ, тута салгыы ыйыталаһар санаалара ханнан хаалар үһү.

Хотугу Осетияттан билиҥҥитэ икки киһи Уһук Илиҥҥэ сир ыларга сайабылыанньа түһэрбит. Иккиэн Дьокуускай таһыгар дьиэ туттар, тыа хаһаайыстыбатынан дьарыктанар баҕалаахтар эбит. “Российская газета” суруналыыһа Дьокуускайга кыһын сэттэ ый сатыылыырын, 41 кыраадыска диэри тымныйарын, куорат бэйэтэ ирбэт тоҥҥо турарын ыйан туран, бу дьон онтон чаҕыйбаттар быһыылаах диэн бэйэтигэр түмүк оҥостубут.

Оттон Ставропольеттан биир бастакынан “босхо гектар” хаһаайынынан буолар баҕалааҕын биллэрбит Александр Скребцов, этэргэ дылы, “герой дня” буолбут. Кини ойоҕунаан Амур уобалаһыгар сир ылан туризмынан дьарыктанар санаалаах.

Уһук Илиҥҥэ биирдэ да сылдьа иликпин, ол эрээри онно тиийиэхпин уруккуттан ыраланабын. Судаарыстыба оннук кыаҕы биэрбитин туһанар санаалаахпын, — диэн Александр Скребцов хаһыат суруналыыһыгар санаатын үллэстибит.

Уһук Илини сайыннарыыга миниистири солбуйааччы Сергей Качаев “босхо гектары” ылыыга 2017 сыл устата 250 тыһыынча сайабылыанньа киириэ диэн эрэнэ күүтэр. Итиэннэ Уһук Илиҥҥэ бэйэлэрин бырайыактарын олоххо киллэрэргэ дьулуһар дьоҥҥо бары усулуобуйаны тэрийиигэ кыалларынан көмөлөһүөхпүт диэн этэр.

Следите за самым важным и интересным в Telegram-канале и WhatsApp-группе ЯСИА
Тутаах тыллар