Аан дойду биэс төгүллээх чөмпүйүөнэ, Афинатааҕы Олимпийскай оонньуулар кыайыылаахтара, Европа үс төгүллээх чөмпүйүөнэ Хаджимурат Гацалов Саха сирин сүүмэрдэммит хамаандатыгар сүбэһит-тренерынан үлэлииргэ сөбүлэстэ.
Аатырбыт бөҕөһү сүбэһитинэн тустуу Федерациятын бэрэсидьиэнэ Айсен Николаев ыҥырда. Бөҕөстөр кэнники үс сыллааҕы түмүктэрин көрөн, Айсен Николаев хамаандаҕа уларыйыы, саҥа сүүрээн наадатын этэр.
«Хаджимурат Гацалов чаҕылхай спортсменын таһынан тренер быһыытынан эмиэ биллэр. Кини Казахстаан бөҕөстөрүн кытары таһаарыылаахтык үлэлээбитэ. Билигин Саха сирин сүүмэрдэммит хамаандатын кытары үлэлэһэргэ сөбүлэстэ. Тренер бүтүн олимпийскай эргииргэ үлэлиирин былаанныыбыт», — диэтэ Ил Дархан.
Айсен Николаев үлэ былаанын саҥаттан оҥорору эттэ. Кини Дьокуускайга, өрөспүүбүлүкэ улуустарыгар оҕолор турнирдарын элбэтэргэ болҕомтону уурары эттэ.
«Бүгүҥҥү тустуу, спорт атын көрүҥнэригэр холоотоххо, сомоҕолоһууну ордук эрэйэр. Билигин өйбүтүн-санаабытын бииргэ түмэн, урукку тустууктарбыт, тренердэрбит ситиспит кирбиилэрин ситиһэргэ дьулуһуохтаахпыт», — диэтэ өрөспүүбүлүкэ баһылыга.
