Мэҥэ Хаҥалас улууһун II Тыыллыма нэһилиэгиттэн былыр-былыргаттан айылҕаттан айдарыылаах ырыаһыт, үҥкүүһүт талааннаах дьон тахсаллара…
Ол да иһин буоллаҕа, бу, сүүс иһинэн нэһилиэнньэлээх, кэрэ айылҕалаах Хаатылыма сэлиэнньэтигэр искусствоҕа сүгүрүйээччи урут-уруккаттан элбэх.
Хаатылыматааҕы Култуура дьиэтин иһинэн тэриллибит “Үрүйэчээн” үҥкүү кэлэктиибигэр сүрүннээн олохтоох оскуола-саад педагогтара, култуура үлэһиттэрэ, нэһилиэк олохтоохторо дьарыктаналлар. Салайааччы – Култуура киинин дириэктэрэ Фаина Спиридонова.
“Үрүйэчээн” ансаамбыл бу олох соторутааҕыта Доллу нэһилиэгэр Тумулга тиийэн, “Эдэрдии эрчими эҥэрдэһэн-2018”диэн ХI аһаҕас улуустааҕы үҥкүү куонкуруһугар кыттан кэллэ. Манна Мэҥэ Хаҥалаһы сэргэ, ыаллыы Чурапчы, Амма улуустарыттан тиийэ үҥкүү кэлэктииптэрэ кыттыбыттарынан сылыктаатахха, куонкурус балачча тыҥааһыннаах буолбут. Оттон “Үрүйэчээн” бу куонкуруска бэрт ситиһиилээхтик кыттан, түмүктүүр Гала-кэнсиэргэ үҥкүүлүүр чиэстэннэ.
Билигин ансаамбыл Өрөспүүбүлүкэ күнүгэр аналлаах бырааһынньыктааҕы кэнсиэргэ кыттаары, бэлэмнэнии үгэнигэр сылдьар.
Татьяна МАРКОВА, edersaas.ru
