Өрөспүүбүлүкэ баһылыга Айсен Николаев хаарбах уонна саахалланар туруктаах дьиэлэртэн дьону көһөрүү тэтимин түргэтэр соругу туруорда. 2024 сылга 1 мөл 142 кв.м. көһөрүллүөхтээх. Кини бырагырааманан үбүлээһини кыайан кэмигэр туттубатах муниципалитеттар харчылара бырайыагы кыраапыктан таһаарбат улуустарга бэриллиэн сөбүн эттэ, диэн СИА иһитиннэрэр.
«2024 сылга диэри биһиги 1 мөл кв.м. тахса иэни көһөрүөхтээхпит. Бырагыраама улуустары барытын хабар. 2019 сылга 86 тыһ.кв.м. хаарбах дьиэттэн босхолонуохтаахпыт, онтон 16 тыһ. сыл бүтүөр диэри«, — диэтэ Айсен Николаев.
Кини эһиилгиттэн тэтими күүһүрдүү наадатын эттэ. Муниципалитеттар быар куустан баран олорбокко, бырагыраама олоххо киириитигэр кимиилээхтик ылсалларыгар эттэ. Барыта бэйэбит хайдах үлэлиирбититтэн тутулуктааҕын санатта.
Бүгүҥҥү күҥҥэ харчыларыттан матыан сөптөөхтөрүнэн Сунтаар улууһа, Нерюнгри оройуонун Иенграта, Жатай, Уус Алдан улууһун Бороҕоно. Оттон, Ил Дархан бэлиэтээбитинэн, бэлэмнээх улуустар уонна нэһилиэктэр баһылыктара тутааччылары уонна кинилэр үлэлэрин тэрийиигэ олус көхтөөхтөр.
Ил Дархан Арктика зонатыгар бырагыраама үлэтин комментарийдаата: «Арктикаҕа кыһалҕалар бааллар. Суол-иис, килиимэт, тутуу ыытыллар болдьоҕо кылгаһа, тутар тэрилтэлэр суохтара. Ол иһин СӨ тутуу министиэристибэтэ уонна өрөспүүбүлүкэ тутууга дирекцията тэрээһин үлэтигэр кинилэргэ көмөлөһөргүтүгэр».
