28 Кулун тутар 28.03
  • -13°
  • $ 92,59
  • 100,27

Хаандыгаҕа үөрэммит саха кыргыттара геолог буолуохтара

Читайте нас на
Яндекс Новости
ЯДВ

Хаандыгатааҕы хайа-геологическай техникум устудьуоннара үөрэхтэрин кэнниттэн Күрбэлээх диэн сиргэ баар Хотугулуу-илиҥҥи федеральнай университет геологическай баазатыгар дьарыктаннылар.


Хаандыгатааҕы техникумҥа сиртэн хостонор баайдаах сирдэри көрдөөһүн, чинчийии уонна геологическай устуу идэтигэр үөрэтэр бөлөҕү 2014 сыллаахха аан бастаан арыйбыттара. Билигин 10 устудьуон 3-с кууруска, 9 устудьуон 2-с кууруска таҕыстылар.

Кинилэргэ талбыт идэлэригэр бэлэмнэнии биир сүрүн көрүҥүнэн практиканы барыы буолар. Хайалар быыстарыгар баар сиргэ алта устудьуон: биэс кыыс уонна биир уол сырыттылар. Кинилэри преподаватель Анна Михайлова уонна техникум минералогическай түмэлин дириэктэрэ, 40 сыл геологынан үлэлээбит Клавдия Мексярова салайан илдьэ сырыттылар.

«Устудьуоннар үс маршрутунан үлэлээтилэр. Ол курдук бастакы маршрутка 1200 үрдүктээх Треугольнай хайаҕа ытыннылар. Маршрутнай точкалары бэлиэтииргэ үөрэнэн 100-150 м буола-буола бэлиэлэри туруордулар, ааһар сирдэрин чинчийэн суруйдулар. Иккис маршруттарыгар түһэн олорор Күрбэлээх үрэхтэрин күрбэтиттэн «Чертовы Ворота» диэн сиргэ дылы 7 км тиийэн хайа быстыбыт сиригэр хас биирдии дьапталҕаны, онтон ылбыт боруобаларын суруйдулар, төһө сиргэ тайаан сытарын быһаардылар. Барыта 100-150 м иэннээх сиргэ чинчийдилэр. 3-с маршрутка чубукулааҕын иһин Баранья диэн ааттаммыт 1600 м кэриҥэ үрдүктээх хайаҕа 1100 м үрдүккэ тахсан эмиэ дьапталүалары суруйдулар», — диэн Анна Михайлова кэпсээтэ.

Устудьуоннарга бэйэлэрин тустаах идэлэринэн үөрэнэллэрин таһынан Томпо улууһун айылҕа харыстабылын инспектора Ньургустаан Бысыин уонна уопсастыбаннай инспектор Николай Смородников ураты харыстанар сиргэ сылдьыы быраабылатын, адьырҕа кыылтан көмүскэнии, уоттан сэрэхтээх буолуу туһунан кэпсээтилэр. Устудьуоннар ураты харыстанар сир үүнээйилэрин үөрэнэр альбомҥа анаан хаартыскаҕа түһэрдилэр.

Устудьуоннар ортолоругар Уус Майа, Сунтаар, Мэҥэ Хаҥалас, Үөһээ Бүлүү бэрэстэбиитэллэрэ бааллар. Сорохторо хайалаах сирдэргэ аан бастаан сырыттылар, үлэлээтилэр. Кыыс геолог сыралаах үлэтин идэ оҥосторо уустуктардаах. Эдэрдэр талан ылбыт идэлэригэр бэриниилээх буолалларын олох көрдөрүө.

Следите за самым важным и интересным в Telegram-канале и WhatsApp-группе ЯСИА