Өрөспүүбүлүкэтээҕи Быыбар киин хамыыһыйатыгар РФ Накаастабылы толорор федеральнай сулууспатын Саха сиринээҕи управлениетын тэрилтэлэригэр Россия бэрэсидьиэнин быыбарыгар бэлэмнэнии боппуруоһун ырытыстылар.
Өрүттэр көрсүһүүлэригэр управление начаалынньыгын эбээһинэһин быстах кэмҥэ толорор, ис сулууспа полковнига Владимир Узлов иһитиннэрбитинэн, анал бөлөх тэриллэн үлэлиир. Бу бөлөх накаастабылы толорор уорган подразделениеларыгар сыһыарыллыбыт быыбардыыр учаастактары кытта үлэлэһэр.
Дьокуускай куораттааҕы 1 №-дээх силиэстийэлиир изоляторга анал хостору, ирдэниллэр докумуоннары бэлэмнииллэр. Быыбардыыр быраап, быыбарга кыттыы бэрээдэгин туһунан матырыйааллар тэрилтэлэргэ ыйанан тураллар. Ону ааһан, эбии иһитиннэрии араадьыйанан тиэрдиллэр уонна дуоһунастаах үлэһиттэр камералары күн аайы кэрийэн көрөллөрүгэр эмиэ кэпсииллэр, быһаараллар.
Бүгүҥҥү күҥҥэ бу силиэстийэлиир изоляторга быыбардыыр бырааптаах 282 киһи олорор: уорбаланааччылар, буруйданааччылар уонна сокуоннай күүһүгэр киирэ илик бириигэбэрдээх сууттаммыт дьон.
Маны тэҥэ, дьиэтээҕи хаайыыга (19 киһи) олорооччулар эмиэ быыбарга кытталлар. Маннык миэрэлээх дьон быыбардыыр учаастакка холуобунай-толорор иниспиэксийэ үлэһитэ арыалдьыттаах бараллар биитэр кинилэргэ быыбардыыр хамыыһыйа чилиэннэрэ дьиэлэригэр тиийиэхтэрэ.
Быыбар киин хамыыһыйатын бэрэссэдээтэлэ Алексей Ефимов холуобунай-толорор систиэмэ подразделениеларыгар тэрээһин үлэтэ, быыбардааһын мэлдьи үрдүк таһымнаахтык ыытылларын бэлиэтээн туран, управление салалтатыгар махтанна.
Бу туһунан РФ Накаастабылы толорор федеральнай сулууспатын Саха сиринээҕи управлениетын пресс-сулууспата иһитиннэрдэ.
