Сунтаарга С.А.Зверев – Кыыл Уола норуот айымньытын киинигэр улуус култууратын салалтата “Новые подходы в работе муниципальных клубных учреждений на современном этапе” өрөспүүбүлүкэ култууратын үлэһиттэригэр семинар тэрийдэ. Улуустарын култуурата тэриллибитэ 75 сылын уонна методическай киин айылгытын салалтата тэриллибитэ 20 сылларыгар анаатылар.
Сунтаардааҕы сэминээргэ Ньурбаттан, Бүлүүттэн, Үөһээ Бүлүүттэн, Уус Алдантан, Чурапчыттан кытыннылар. Хаҥаластар халыҥ хамаандарыгар Төхтүр, Уулаах Аан, Нөмүгү, Хачыкаат, Күөрдэм култуура кииннэрин, култуура салалтатын уонна “Арчы Дьиэтэ” норуот айыньытын киинин исписэлиистэрэ киирдилэр.
Сэминээр үөрүүлээх аһыллыытын С.А.Зверев – Кыыл Уолун “Оһуор үҥкүүтүн” хамсаныыларынан, мунньах кыттыылаахтарын кытыннаран, алҕаан бэрт сонуннук арыйдылар.
Сунтаар улууһун култуураҕа уонна духуобунай сайдыыга салалтатын салайааччыта Мария Васильевна Кобельянова – Тускулаана эҕэрдэлээтэ.
Өрөспүүбүлүкэтээҕи норуот айымньытын дьиэтин үлэһиттэриттэн кыттыыны ыллылар директор Сергей Степанович Семенов, Сардаана Петровна Егорова, Александра Васильевна Васильева, Любовь Ивановна Васильева. Кинилэр национальнай бырайыак, идэ стандартарын уураахтарын, сыаллаах бырагыраамалар, саха норуотугар сыаната биллибэт нэһилиэстибэтин сайдыыларын туһунан сырдаттылар. Горнайтан улуус култуураҕа уонна духуобунай сайдыыга салалтатыттан, салайааччы солбуйааччыта, Саха Өрөспүүбүлүкэтин култууратын үтүөлээх үлэһитэ Софья Никитична Алексеева кэммиэрчэскэйэ суох тэрилтэлэр хайдах үбү-харчыны киллэриэхтэрин сөбүн түһүнан кэпсээтэ, Үөһээ Бүлүүттэн Н.И. Бойлохов аатынан искусство оскуолатын фольклорга салаатын салайааччыта Айталина Михайловна Мойтохонова бэйэтин үлэтин уопутуттан кэпсээтэ уонна аҕатын М.Т.Мойтохонов фондатын сырдатта.
Норуот маастардарын үлэлэрин саалатыгар сылдьаммыт астына-дуоһуйа көрдүбүт.
“Лучший менеджер клубной деятельности” өрөспүүбүлүкэ таһымыгар ыытыллар күөн- күрэс 2-с туурун ыыттылар. Бастыҥ дириэктэр, бастыҥ методист, бастыҥ уус-уран салайааччы диэн ааттар иһин күрэхтэстилэр.
Хаҥалас улууһуттан “Өрөспүүбүлүкэ бастыҥ уус-уран салайааччыта” үрдүк аат кыайыылааҕынан таҕыста Төхтүр нэһилиэгин “Эркээни” култууратын киинин уус-уран салайааччыта Зинаида Валерьевна Аввакумова, “Арчы Дьиэтэ” норуот айымньытын методиһа Надежда Валерьевна Степанова “Лучший методист КДУ” буолла, 1 үрдэл дипломунан наҕараадаланна.
Бастыҥ методист аата Сунтаардааҕы “Бартыһаан” култууратын киинин методиһыгар Наталья Асамоваҕа уонна “Бастыҥ култуура киинин дириэктэрэ” ааты сүктэ Уус Алдан кулуубун дириэктэрэ Альберт Находкин.
Бастаабыт үлэһиттэргэ анал Кубок уонна диплом туттардылар.
Үбүлүөйдээх тэрээһиҥҥэ кыттааччылары улуус, нэһилиэк баһылыктара эҕэрдэлээтилэр. Кинилэр бары сахалыы таҥныбыттара дьоһуннаахтык көһүннэ.
Хаҥалас култууратын аатыттан эҕэрдэлээтэ биһиги салайааччыбыт Саха Өрөспүүбүлүкэтин култууратын туйгуна Сахаайа Владимировна Громова уонна култуура үлэһиттэрэ таһааттарбыт саҥа кинигэлэрин уонна Хотой бэлиэлээх статуэткабытын бэлэх биэрдэ. Улахан делегация тахсан күргүөмүнэн култуурабыт өрөгөй ырыатын видеоролигын көрдөрөн, өрө күүрүүлээхтик толорон, мустубут дьон бары сүһүөхтэригэр туран ыллаһан, олус сэҥээрдилэр. Сэминээр кыттыылаахтара бары өйдөбүнньүк хаартыскаҕа түстүбүт.
Биһиги биир дойдулаахпыт Ньургуяна Сидоровна Колесова – Данилова Сунтаардарга кийиит буолан олохсуйан, методиһынан бэрт таһаарыылаахтык үлэлии сылдьар. Кини туһунан салайааччыта М.В.Кобельянова олус истиҥ иһирэх тыллары этэн биһиэхэ махтанна, биһиги киэн тутуннубут.
Сэминээр иккис күнүгэр култуура үлэтигэр сыһыаннаах маастар-кылаастар ыытылыннылар, СИА-ҕа суруйда «Хаҥалас» хаһыат уопсастыбаннай кэрэспэдьиэнэ Лидия Харитонова.
