Сааскы Өлүөнэ өрүс халааныгар Хаҥаласка Кытыл Дьура, Хоточчу, Өктөм, Чкалов сэлиэнньэлэрэ эмсэҕэлээбиттэрэ. 326 киһи, ол иһигэр 88 оҕо, олорор 77 дьиэтэ ууга барбыта. Муниципальнай суолталаах уон суол ууттан алдьаммыта. Экспертиза түмүгүнэн 2694 килэмиэтир суол алдьаныыта 6852400 солкуобайга тэҥнэспитэ.


Хаҥалас улууһугар бүгүҥҥү күҥҥэ халаантан эмсэҕэлээбит суоллар өрөмүөннэнэн, сырыы салҕанар. Өктөмҥө «Автодор РИК» АУо  (сал. Сидоров А.К.) уонна «ТСК» ХЭТ (сал. Осипов О.П.) хантараагынан үлэлээтилэр. Хоточчуга «Труд» ХЭТ (сал. Миненко А.П.) өрөмүөҥҥэ үлэлээтэ. Бу иннинэ СӨ транспортка уонна суол хаһаайыстыбатыгар министиэристибэни кытары үлэни ыытыыга Сөбүлэһии түһэрсиллибитэ. СӨ бырабыыталыстыбатын 2018 с. от ыйын 19 күнүнээҕи 823-р №-дээх дьаһалынан халаантан алдьаныыны чөлүгэр түһэриигэ бюджет икки ардынааҕы трансфертан үп кэмигэр көрүллүбүтэ. 2055720 солкуобай, көмө үп 30 бырыһыана, улуус бюджетыгар атырдьах ыйын 20 күнүгэр киирбитэ. Бу үп суолу тутууга атырдьах ыйын 27 күнүнээҕи туругунан толору туттулунна.

Хоточчуга ОДьКХ эбийиэктэригэр 644 п.м. ититэр тиһик бүрүөһүнэ уу кэлэн туһаттан тахсыбыта, 854335 солкуобайдаах хорумньу буолбута. Кыстыгы көрсө Хоточчуга дьиэлэри, эбийиэктэри ититэр тиһиктэр этэҥҥэ матырыйаал булуллан бүрүлүннүлэр.

Тыа хаһаайыстыбатыгар улахан хорумньу тахсыбыта. Төһө кыалларынан чөлүгэр түһэрии үлэтэ тэрилиннэ. Ол курдук, үс хотон уонна Хахсыкка дьиэ эмсэҕэлээбиттэрэ, 1645924 солк. хорумньу халаан уутуттан тахсыбыта. Өктөмҥө үс хотонтон иккитэ (Петров Г.М. КФХ) көтүрүллүннэ, үрдүк сиргэ көһөрүүгэ үбү күүтэллэр. «Хахсык» ТХПК хотоно уонна дьиэтэ хаһаайыстыба бэйэтин күүһүнэн чөлүгэр түһэрилиннэ.

Уу халааныттан биэс тыа хаһаайыстыбата суолталаах быһыт алдьаммыта, ол иһигэр «Аска-үөлгэ политикатыгар уонна тыа хаһаайыстыбатыгар министиэристибэ сири ньүөлсүтүүгэ уонна уунан хааччыйыыга управление» ГБУ үс уонна икки муниципальнай бас билиигэ баар быһыттара. Балары чөлүгэр түһэриигэ оройуон бюджетиттэн 581 924,61 солкуобай ороскуоттанна.

Материальнай көмөнү оҥоруу

Өрөспүүбүлүкэ бюджетыттан материальнай көмөнү 71 ыал (270 киһи, ол иһигэр 50 оҕо) ылла. 3 170,0 тыһ. солк. көмө оҥоһулунна, ол иһигэр биир кэмнээх материальнай көмөнү -1 350,0 тыһ. солк. бу үөһэ ааттаммыттарга барыларыгар, 140 киһи (36 ыал) күннэтэ туттуллар малын-салын сорҕотун сүтэрбитинэн, уопсайа 1400,0 тыһ, солк., уонна 21 киһи (4 дьиэ кэргэн) бас билиитин олорчу былдьаппытынан, 420,0 тыһ.солк. Үп оройуон дьаһалтатын счетугар 2018 с. бэс ыйын 1 күнүгэр киллэриллибитэ. Төлөбүрү ууттан эмсэҕэлээбит дьон бигэргэтиллибит испииһэгинэн оҥордулар. Көмөнү бары ыллылар. Балартан өссө 420,0 тыһ. солк. төннөрүлүннэ — 4 киһи прописката суоҕа биллибитэ.

РФ резервэҕэ фондатыттан 10 830,0 солк. «Хаҥалас улууһа» МО дьаһалтатын счетугар 2018 с. атырдьах ыйын 13 күнүгэр киирбитэ. 2018 сыл атырдьах ыйын 14 күнүгэр халаантан эмсэҕэлээбиттэр испииһэктэрэ чуолкайдаммыта уонна сарсыныгар гражданнар счеттарыгар харчы ыытыллыбыта.

Барыта материальнай көмөҕө 248 киһиттэн (71 ыал), ол иһигэр 41 оҕо, 10 830,0 тыһ. солк. сайаапка түһэрбиттэрэ, ол иһигэр 248 киһи (71 ыал) 2 480,0 тыһ. солк. биир кэмнээх материальнай көмөҕө, 129 киһи (36 ыал) күннэтэ туттар малларын-салларын сорҕотун сүтэрэн — 6450,0 тыһ. солк., 19 киһи (4 ыал) барытын олорчу сүтэрэн — 1 900,0 тыһ. солк.

Этиллибитин курдук 460,0 тыһ. солк. прописката суох түөрт киһиттэн төннөрүллүөҕэ, ону сэргэ 60,0 тыһ. солк. — биир киһи 2018 сыл от ыйын 30 күнүгэр олохтон барбытынан.

Кыра дохуоттаах гражданнар испииһэктэригэр 12 ыал киллэриллибитэ, 140,0 тыһ. солк. көмө оҥорорго. Ол иһигэр 9 ыалга 110,0 тыһ. солк. бэрилиннэ уонна Хоточчуга үс ыалга 30,374 тыһ. солк. Ыаллар бары бу көмөнү ыллылар.

Барыта оройуон бюджетыгар амарах санаанан көмөнөн 6381127,89 солк. үп киирбитэ. Улуус дьаһалтатын 2018 с. от ыйын 2 күнүнээҕи 194-дээх уурааҕынан уонна халаан уутуттан эмсэҕэлээбит гражданнарга көмөҕө хамыыһыйата эмиэ бу күнүнээҕи мунньаҕын боротокуолунан ордук социальнай көмөҕө улаханнык наадыйар аҥардас олорор пенсионердарга, инбэлииттэргэ 2640,0 тыһ. солк. 60-нуу тыһыынча солк. 44 ыалга бэрилиннэ, онтон 38-һа Өктөм олохтоохторугар 2280,0 тыһ. солк. уонна Хоточчу 6 ыалыгар 360,0 тыһ. солк.

Хаалбыт 3537,6 тыһ. солк. 264 кубометр тутуу маһа — буруус ылыллан 22 ыалга (хас биирдиилэригэр 12 кубометр буруус — 6х6 дьиэ маһа) дьиэлэрин үрдүк, инфраструктура баар сиригэр тутталларыгар бэрилиннэ. Маһы тиэйиигэ, таһыыга, сүөкээһиҥҥэ 960 тыһ. солк. туттулунна. Маны тэҥэ Хоточчуттан Устиновтар дьиэ кэргэҥҥэ 1000 устуука кирпииччэни 60 тыһ. солк. бэрилиннэ.

Барыллаан суруйуунан, көмөнү ылыыга эбии испииһэккэ 79 киһи киллэриллибитэ (140 ыал, ол иһигэр 47 оҕо). Суут быһаарыытынан, 19 киһи (10 ыал), ол иһигэр 12 оҕо, бэрилиннэ.

Оҕо сайыҥҥы сынньалаҥа

Халаантан эмсэҕэлээбит ыаллартан 20 оҕо сайын сынньанарыгар үөрэх салалтата усулуобуйа тэрийдэ. Өктөмтөн 25, Хоточчуттан 1 оҕо лааҕырдарга сырытта: 3 оҕо Владивостока «Океан», 10 оҕо Дьокуускайга «Виктория», 7 оҕо Дьокуускайга «Сосновый бор» уонна «Заря», «Чэбдигирии» күнүскү лааҕырдарга.

Доруобуйа харыстабыла

СӨ Доруобуйа харыстабылыгар министиэристибэтин 2018 с. бэс ыйын 4 күнүнээҕи 01-07/754 №-дээх «Амма уонна Хаҥалас оройуоннарыгар «Доруобуйа» десант туһунан» бирикээһинэн халаантан эмсэҕэлээбиттэргэ миэстэтигэр баран, анал медицинскэй уонна сэрэтиигэ көмө оҥоһуллубута. Кардиолог, эндокринолог, отоларинголог быраастар дьону көрбүттэрэ, ультразвуковой диагностикаҕа исписэлиис сылдьыбыта. Хаҥалас улууһуттан ууттан эмсэҕэлээбит 200 киһи, ол иһигэр Өктөмтөн 160, Хоточчуттан 40 киһи, доруобуйаларын бэрэбиэркэлэппиттэрэ.

Ааптар: Н. ЯКОВЛЕВ

0
0
comments powered by HyperComments