Олохтоох көҕүлээһиннэри өйүүр өрөспүүбүлүкэтээҕи бырагырааманан Ой сэлиэнньэтигэр баанньыгы уонна кулуубу өрөмүөннүөхтэрэ.
“Бу дьиэлэр 70-с сылларга тутуллубуттара. Төһө да эбийиэктэр үлэлии турдаллар, олохтоохтор баанньыгы уонна ”Түһүлгэ” култуура киинин ис-тас көрүҥнэрин өрө тардары туруорсубуттара”, — диэн СИА-ҕа олохтоох дьаһалта баһылыгын солбуйааччы Тимофей Филиппов иһитиннэрдэ.
Төһө да таас тутууларын иһин, ититэр ситимин өрөмүөннүөххэ, уотун-күөһүн уларытыахха, косметическай өрөмүөнү ыытыахха наада.
Бу бырайыактары олоххо киллэриигэ нэһилиэк өрөспүүбүлүкэ бүддьүөтүттэн 2 мөл солк. ылыаҕа. Олохтоох бүддьүөккэ 300 тыһыынча солк. угуллубута. 200 тыһыынчаны олохтоохтор киллэриэхтэрэ.
Филиппов этэринэн, өрөмүөннүүр үлэлэр бу сыл бүтүөр диэри түмүктэниэхтэрэ.
Руслан Басыгысов, СИА.