Төрөөбүт тыл уонна сурук-бичик күнүгэр Хаҥалас улууһун “Арчы Дьиэтэ” “Сардаана”, “Сказка” дьыссааттарга сырытта. Одун Хаан ыйыгар аналлаах 5-6 саастаах оҕолорго тылы киллэрии сиэрин-туомун ыытта.
Норуот айымньытын киинин директора Лидия Харитонова сылын ахсын Хаҥалас улууһун оҕолорун дорҕоон көмөтүнэн сахалыы саҥара үөрэтэр, ийэ уонна аҕа оҕолорун ситимигэр алгыстаах аккырыыкка түҥэтэр.
Аккырыыкка төрөппүт оҕолоругар болҕомто уурарыгар тирэх буолар. Кистэл буолбатах, билиҥҥи балысхан түргэн тэтимнээх сайдыылаах үйэҕэ төрөппүттэр оҕолорун кытта ыкса сибээстэрэ тэйдэр тэйэн иһэр. Үгүс оҕо төрөөбүт тылларынан саҥарбат да буоллулар.
Оҕо 2 — 3 сааһыттан саҥарар. Ити кэмҥэ дьыссаакка бараллар, күннэрин улахан аҥара онно ааһар. Онон сахалыы бөлөх иитээччилэрэ сахалыы тылынан араас оонньуулары толкуйдаан үлэлииллэр.
«Биири бэлиэтии көрөбүн — уһуйааннарга олоҥхоҕо дьарыктаах, ситиһиилээх оҕолор, хомойуох иһин, оскуолаҕа киирдэхтэринэ бу дьарыктарын умна быһыытыйан, олоҥхолуур баҕалара сүтэн, атын хайысханан бараллар. Инникитин оһуоба киин улуустарга тылы сайыннарыыга күүстээх үлэ барара ирдэнэр», — диир Лидия Харитонова.
