Нам улууһун Партизан сэлиэнньэтигэр сылгыһыттар ортолоругар “Сылгыһыт күрэҕэ” ыытылынна. Манна 10 оройуонтан 13 хамаанда кытынна. Кыайыыны Хаҥалас сылгыһыттара ситистилэр.
Быйыл хамаандалар үс сылгыһыттаах, ол иһигэр 50 диэри саастаах биир бэтэрээннээх буолуохтаахтар.
Чэпчэкитэ суох эстафетаҕа Хаҥалас оройуонун хамаандата 3 мүнүүтэ 41 сөкүүндэни ылан, кыайыылааҕынан таҕыста. Кинилэргэ хас биирдиилэригэр карабины туттардылар. “Үрүҥ көмүһү” уонна “боруонсаны” Мэҥэ Хаҥалас уонна Өлүөхүмэ оройуоннара ыллылар.
