Өлүөнэ өрүс мууһун устуута Хаҥалас улууһун кыраныыссатыгар кэлиитэ ыам ыйын 10 күнүгэр күүтүллэр.
Муус хаайтарар кутталлаах учаастактарынан Батамай чаара уонна Табаҕа тумула ааттаналлар. Табаҕа аттынан мууһу хараардыы үлэтэ түмүктэнэн эрэр.
Улуус 12 сэлиэнньэтин халаан уута ылыан сөптөөҕө сабаҕаланар. Манна 16 быстах кэмҥэ олохтооһун пуунугар уонна үс балаакка бөһүөлэгэр 1 647 киһини көһөрүү былааннанар.
Муус устуутун кэмигэр үс стационарнай уонна аҕыс кылгас болдьохтоох гидропост Өлүөнэ өрүс уутун таһымын кэтиэҕэ.
2019 сыллаахха өрүс мууһун устуута ыам ыйын 15 күнүгэр Хаҥалас улууһун кыраныыссатыгар кэлбитэ, диэн суруйар НВК «Саха».
