Горнай улууһугар баһаар буолар түгэнигэр, ол туһунан дьоҥҥо суһаллык биллэрэргэ анаммыт бырайыак үлэтин саҕалаата. Өрөспүүбүлүкэтээҕи бырагырааманан үөрэх тэрилтэлэригэр GSM-биллэрии тэриллэрин туруордулар.


Горнай улууһугар гражданскай оборона уонна ыксаллах быһыы-майгы отделын кылаабынай исписэлииһэ Айысэн Стручков «Комплекс автоматического оповещения пожарной безопасности в обьектах соцкультбыта и местах массового пребывания людей на территории Республики Саха (Якутия)» бырайыак үлэтэ сайынтан саҕаламмытын эттэ.

“Чаҕылҕан” ХЭУо тест быһыытынан биэс үөрэх тэрилтэтигэр баһаарынай сигнализацияларыгар эбии GSM-биллэриилэри туруорбута. «Бу дьаһал баһаарынай сигнализация үлэлиирин үлэлээбэтин, ханна эрэ линия быстыбытын барытын компьютерынан баһаарынай чааска, ЕДДСК-ка көрдөрөр. Баһаар буолар түгэнигэр 10-ча эппиэттээх киһиэхэ тута сотовай төлөпүөннэригэр СМС иһитиннэрии тиийэр», — диэн быһаарда Стручков.

Эппиэттээх исписэлиистэр бу бырайыак дьон олоҕор быһаччы туһаайарынан, тэрилтэ салайааччылара прибордары туруоттаралларыгар сүбэлииллэр. GSM баһаарынай чаас суох сиригэр, нэһилиэктэргэ ордук табыгастаах. Баһаар буолар түгэнигэр биллэрии 10 киһиэхэ — баһаарынай хамаанда дьонугар, баһылыкка, тэрилтэ үлэһиттэригэр — тутатына тиийэр. Онон эрдэ дьаһанан, уоту ыраатыннарбакка умуоруохтарын сөп буолар.

Санатар эбит буоллахха, сигнализация чааһынай дьиэҕэ эмиэ туруон сөп.

Ааптар: Күннэй Алексеева, Горнай улууһа, Бэрдьигэстээх

0
0
comments powered by HyperComments