Горнай улууһун баһылыга Никита Андреев «Азия оҕолоро» Оонньуу призердарын уонна тренердэрин чиэстээтэ.
Улуус эдэр кэскиллээх спортсменнара хапсаҕайга Эдуард Максимов, оҕунан ытыыга Виктория Алексеева, Уолан Петров, Сеня Суханов, дуобакка Тунаара Федорова, буулдьанан ытыыга Ньургустаана Борохина, Юра Константинов улууспут, өрөспүүбүлүкэбит чиэһин көмүскээтилэр.
Хапсаҕайга Эдуард Максимов, оҕунан ытыыга Виктория Алексеева үрүҥ көмүс мэтээл, оттон Тунаара Федорова, буулдьанан ытыыга Ньургустаана Борохина боруонса мэтээл хаһаайыннарынан буоллулар.
«Спортсменнар ситиһиилээхтик кытыннылар. Оҕунан ытыыга Индонезияттан, Казахстантан, Бурятияттан, Забайкальяттан күүстээх хамаандалары кытта Уолан Петров, Виктория Алексеева, Сеня Суханов тэҥнээхтик кииристилэр. Юра Константинов 0,7 суотайынан IV миэстэ буолла. Бу тренердэр уонна төрөппүттэр тэҥҥэ үлэлэһэн үрдүгү ситистилэр», — диэтэ Горнай улууһун өрөспүүбүлүкэтээҕи олимпийскай эрэллэри бэлэмниир оҕо спортивнай оскуолатын дириэктэрин солбуйааччы Никон Дьяконов.
Улуус баһылыга Никита Викторович призердэргэ уонна тренердэргэ үөрүүлээх быһыыга-майгыга Махтал суруктары, харчынан бириэмийэлэри туттарда. Онтон төрөппүттэргэ «Чыпчаал» кинигэни анаата.
««Азия оҕолоро» Оонньууга кыттарбар күүс-көмө буолбут тренербэр Егор Иннокентьевич Никоноровка, төрөппүттэрбэр махталбын тириэрдэбин. Эдэр спортсменнарга инникитин Россияҕа, аан дойдуга тиийэ Олимпиадаларга кыттан өрөспүүбүлүкэбит, улууспут аатын киэҥ сиргэ ааттатарбытыгар баҕарабын», — диэн эттэ спорсменнар ааттарыттан Эдуард Максимов.
