Горнай улууһугар олохтоох табаары оҥорон таһаарааччылар Иван Ксенофонтов уонна Николай Ефремов «Сайылык» маҕаһыын арыйдылар, СИА -ҕа предпринимательство министиэристибэтин пресс-сулууспата иһитиннэрдэ.
Маҕаһыыҥҥа Иван Ксенофонтов салайааччылаах «ГорныйМясоПродукт» ТХППК уонна Николай Ефремов дьаһалталаах «Горный Ас» ТХППК эт уонна үүт бородууксуйалара атыыга таҕыстылар. Араас көрүҥ барыта баар.
Маҕаһыын арыллар күнүгэр «Горный Ас» саҥа «Сэргэх» диэн ааттаах аһыҥас үүт аһы презентациялаата.
«Бородууксуйа барыта олохтоох табаары оҥорон таһаарааччылар киэннэрэ. Эти бөдөҥ сүөһү хаһаайыстыбалара уонна биирдиилээн ыал туттараллар. Бары улуус олохтоохторо.
Санитарнай нуорма уонна ирдэбил барыта тутуһуллар. Бородууксуйаны Бэрдьигэстээххэ батарарбыт таһынан, эбии Дьокуускай куоракка 30 маҕаһыыны кытта үлэлиибит», — диэтэ Иван Ксенофонтов.
