Горнай улууһун киин балыыһатын үлэһиттэригэр харыстанар көстүүмнэри уонна респираторнай мааскалары Кононовтар дьиэ кэргэн көмө быһыытынан биэрдилэр. Коронавирус тарҕаныаҕыттан, дьон-сэргэ бары бу дьаҥы утары үлэҕэ туох-баар күүстэрин уураллар.
«Горнай» түмсүү уопсастыбаннай тэрилтэ көхтөөх өйөөччүтэ, ыытыллар үлэлэр, бырайыактар спонсордара Гаврил Гаврильевич Кононов уолуунаан Виталийдыын коронавируһу утары охсуһууга анаан олохтоох балыыһаҕа көмө оҥордулар. 23 харыстанар көстүүмү уонна 10 респираторнай маасканы туттардылар.
«Киин балыыһа быраастара бу ыарахан ыарыыны кытта охсуһууга ордук сыраларын-сылбаларын аныыллар. Онон кинилэр дьону эмтииллэригэр харысхаллаах буоллуннар диэн санаанан көмөнү оҥордубут», — диэтилэр Кононовтар дьиэ кэргэн.
«Горнай түмсүү» уопсастыбаннай тэрилтэ Гаврил Гаврильевичка, Виталий Гаврильевичка бу үтүө дьыалаларыгар махталларын биллэрэн, Бэрдьигэстээх инстаграм сирэйигэр суруйдулар.
«Улуустааҕы Киин балыыһа кэлэктиибэ (кыл.быраас солб. Андреева Ж.А.) оройуоммутугар сыстыганнаах дьаҥ бэлиэтэммитигэр, тута профессиональнай билиилэрин сөптөөхтүк туруоран, ыарыы тэнийбэтэ. Коронавирустаабыттар алтыспыт дьоннорун кэмигэр быһааран, «самоизоляция» эрэһиимин олохтоон, билигин олохтоохтор этэҥҥэлэр. Маҥан халааттаах аанньалларбытыгар бар дьон барҕа махтала ананнын«, — диэн суруйар тэрилтэ салайааччыта Надежда Федорова.
