Бүгүн күнүс “Саха сирэ” хаһыат эрэдээксийэтигэр Горнай улууһун Бэс Күөлүгэр сүөһүлэр өлбүттэрин туһунан биллэрии киирдэ. Тустаах бааһынай хаһаайыстыба иллэрээ сыллааҕыта эдэр фермердэргэ анаммыт гранынан сүөһүтүн атыыласпыт.
Бу чахчытын билээри Тыа хаһаайыстыбатын уонна ас-үөл бэлиитикэтин министиэристибэтигэр төлөпүөннүү сырыттыбыт итиэннэ маннык хоруйу туттубут:
— Ити туһунан иһитиннэрии биһиэхэ бэҕэһээ киэһэ киирбитэ. Уон биэс сүөһү, барыллааһын быһыытынан, туохтан эрэ сүһүрэн эбэтэр үгээрдээн өлбүт курдуктар. Бу сарсыарда бэтэринээрдэр тиийэн, өлбүт сүөһүлэр хааннарыттан анаалыс уонна куртахтарыгар баар астан боруоба ыланнар, лабораторияҕа чинчийэ сылдьаллар. Ол чинчийии түмүгүнэн сүөһүлэр өлбүт биричиинэлэрэ быһаарыллыаҕа.
