Горнай улууһун сонуннарын суруйар «Үлэ күүһэ» хаһыат корректора Руслан Николаевич Платонов быйыл 70 сааһын туолла. П.Д. Аввакумов аатынан улуустааҕы киин библиотека, «Сыккыс» литературнай түмсүү кини айар киэһэтин ыыттылар.
Бэрдьигэстээх олохтооҕо, саха суруйааччыта, Россия суруналыыстарын союһун чилиэнэ бэйэтин олоҕун, айар үлэтин туһунан сиһилии кэпсээтэ.
— Саамай сөбүлүүр, үөрэнэр суруйааччым Эрилик Эристиин, кини былыргы саха баай тылын туттан суруйарыгар үөрэнэбин, Далан айымньыларын умсугуйан ааҕабын, хаһыат тыла уонна уус-уран тыл атын-атынын дириҥэтэн билэ сатыыбын. Сахабыт тылын өрө тутуохха, чинчийиэххэ, күннээҕи олохтон саҕалаан куйаарга тиийэ туттуохха. Горнай урут уу сахалыы этэ, билигин нууччалыы таттарыы биллэ-көстө эбиллэн иһэр. Эдэрдэр, суруйар дьон кинигэтэ таһааттарыҥ, элбэхтик суруйуҥ, онно улуус хаһыата өйүүр.
Поэты улуус баһылыгын бастакы солбуйааччы В.В.Спиридонов, суруналыыстар союзтарын бастакы сүһүөх салайааччыта А.Н.Санникова, «Сыккыс» түмсүү салайааччыта А.Н.Олесова, культура үлэһиттэрэ, бэтэрээннэр, общественнай кэрэспэдьиэннэр о.д.а. эҕэрдэлээтилэр.
«Дьүрүскэн» эдэрдэр түмсүүлэрин салайааччыта В.И.Тимофеев поэт хоһооннорун тапталга, ордук имэҥнээх тапталга аныыр диэн ырытыыта сонуннук иһилиннэ. Киниттэн эдэрдэр элбэххэ үөрэнэллэрэ наадатын бэлиэтээтэ. Библиограф А.И.Заровняева Руслан Николаевич библиографическай ыйынньыгын оҥорбуттарын, ол суолтатын туһунан сиһилии быһааран кэпсээтэ.
Ааптар: Василий Алексеев, «Үлэ күүһэ» хаһыат, Горнай улууһа
