Саха сирин Ил Дархана Егор Борисов Саха сирин дьахталларын съеһигэр Герой ийэлэргэ балтараа мөлүйүөн солкуобайдаах бириэмийэлэри туттарбыта. Томпо улууһуттан 15 оҕону төрөтөн, иитэн улаатыннарбыт Вера Константиновна Свинобоева эмиэ итинник бириэмийэҕэ тигистэ. Киниэхэ туоһу суругу улуус баһылыга Георгий Герасимов туттарда.
Вера Свинобоева 1930 с. Чурапчы улууһун Мырылатыгар төрөөбүтэ. Холкуоска, совхозка ыанньыксыттаабыта, кэлин сылларга күндү түүлээҕи тутар пууҥҥа үлэлээбитэ. Кэргэнэ Иннокентий Саввиһы Томпо улууһугар ат баайааччынан ыҥыран аҕалбыттара, онтон ыла Свинобоевтар манна олохсуйан олороллор. Иннокентий Саввич билигин 89 саастаах. Кини Мэҥэ Хаҥалас Маттатыттан төрүттээх. Эдэригэр ат баайааччы этэ, САССР ат спордугар бастакы үтүөлээх тренерэ, кэлин аар тайҕа сонордьута буолбута.
Вера Константиновна:
— 19 саастаахпар кэргэн тахсыбытым. Аҕам сэриигэ баран өлбүтэ, ийэм кыра эрдэхпинэ күн сириттэн күрэммитэ. Кэргэним эмиэ төгүрүк тулаайах этэ. 67 сыл ыал буолан 15 оҕоломмупутуттан 9 уол уонна 6 кыыс этэ. Игирэлэр Андрей уонна Сергей, кыра уол Проня Томпоҕо төрөөбүттэрэ. Билигин 14 оҕо баар, кинилэр механизатор, булчут, бухгалтер, сварщик, зоотехник уо.д.а. идэлэрин баһылаабыттара. Улахан уол Иннокентий кэннэки сылларга Ыҥаа нэһилиэгэр баһылыктаабыта, билигин бэйэбит курдук сынньалаҥҥа олорор. Элбэх сиэннээхпит уонна хос сиэннээхпит.150-ча буоллубут. Егор Афанасьевичка кырдьаҕастарга, Герой ийэлэргэ кыһамньытын иһин махтал.
