29 Кулун тутар 29.03
  • -14°
  • $ 92,26
  • 99,71

Ракетаны көтүтүү өрөспүүбүлүкэ айылҕатыгар дьайыытын аналлаах приборунан бэрэбиэркэлиэхтэрэ

14:14, 22 сентября 2016
Читайте нас на
Яндекс Новости
ЯДВ

Экологияны чинчийэр информационнай-аналитическэй кииҥҥэ гептилы быһаарар аналлаах хроматограф «Цвет Яуза» прибору сүрэхтээтилэр. Айылҕа харыстабылын миниистирэ Сахамина Афанасьева бэлиэтииринэн, бу прибор көмөтүнэн ракета-космос үлэтэ Саха сирин айылҕатыгар дьайыытын бэрэбиэркэлиэххэ сөп.


«Цвет Яуза» хроматограф сир кырсыгар уонна ууга гептил баарын быһаарар», — диир мониторинг киинин салайааччытын э.т. Заретхан Кузьмина.

«Гептил түргэнник тарҕанарынан уратылаах. «Сойуус» ракетаҕа гептил туттуллубатын курдук этэллэр. Ону биһиги бэрэбиэркэлиэх тустаахпыт. Өскөтүн гептили буллахпытына, ракеталары көтүтэр тэрилтэлэр сөптөөх миэрэлэри ылыахтаахтар», — диир кини.

Аналлаах прибору атыылаһарга 9 мөл.солк. өрөспүүбүлүкэ бырабыыталыстыбата биэрбит. «Восточнай» космодромугар ракета-космос үлэлэрэ айылҕаҕа дьайыытын сыаналааһын сүрүн ирдэбил буолла.

РИАЦЭМ дириэктэрэ Лена Волкова прибор көмөтүнэн гептилинэн сүһүрүүнү өрөспүүбүлүкэ таһыгар таһаарбакка, тута бэрэбиэркэлээһин оҥоһулларын, оттон ити ордук чопчу уонна чуолкай түмүгү биэрэрин этэр.

Айылҕа харыстабылын миниистирэ Сахамин Афанасьев этэринэн, киин үлэтэ өссө тупсарыллар, ситэриллэр. Айылҕаҕа оҥоһуллар содуллары быһаарыыга лаборатория дааннайдара ураты улахан суолталаахтар уонна наадалаахтар. Бу дааннайдарга олоҕуран айылҕа харыстабылын сокуоннарын, бэрээдэктэрин кэһээччилэри эппиэккэ тардыахха сөп.

Следите за самым важным и интересным в Telegram-канале и WhatsApp-группе ЯСИА