Тустуук Виктор Лебедев Рио-де-Жанейроҕа ыытыллар Олимпийскай оонньууларга кыттара дуу, кыттыбата дуу бу күннэргэ биллиэҕэ. Бу боппуруоһу FILA быһаарар. Ити туһунан СИА-ҕа спорт миниистирин бастакы солбуйааччы Георгий Балакшин эттэ.
«Билиҥҥитэ туох да биллибэт. Виктор Лебедев Россия сүүмэрдэммит хамаандатын састаабыгар киирэ сылдьар. Бүгүн, сарсын FILA бүтэһиктээх быһаарыыны ылыаҕа», — диэтэ кини.
Норуоттар икки ардыларынааҕы Олимпийскэй кэмитиэт быһаарыытынан 2016 сыллааҕы Олимпиадаҕа добины кытта сибээстээх Россия атлеттара киллэриллибэттэр. Кинилэр ортолоругар Виктор Лебедев эмиэ биир буолуон сөп. Тоҕо диэтэххэ, 2006 сыллаахха юниордар ортолоругар аан дойдуга бастыыр иһин күрэхтэһиигэ 50 кг диэри ыйааһыҥҥа кыһыл көмүс мэтээли ылбыта. Онно кини болденон диэн бобуулаах препараты туттубут диэн буолбута.
