Ыам ыйын саҕаланыыта дойду президенэ Владимир Путин Уһук Илиҥҥэ гектар сири босхо биэриини сүрүннүүр сокуон барылыгар илии баттаабыта. Кистэл буолбатах, уопсастыба ортотугар сокуон тула элбэх мөккүөр баара. Норуот дьокутаата, РЛДП регионнааҕы салаатын салайааччыта Гаврил Парахин Россия салалтатын быһаарыыта сөптөөҕүн чиҥэтэн эттэ.
«Сокуон ылыллыбытыттан мин олус үөрдүм. Хаһаайыстыба тэриниэн баҕалаахтарга олус табыгастаах сокуон буоларын туһунан дьон санаатын элбэхтэ иһиттим. Билигин бюрократия мэһэйэ суох сири ылар кыахтанныбыт», — диир кини.
Кини СИА-ҕа этэринэн, Уһук Илиҥҥэ олохтоох дьоҥҥо сокуон уйгуну-быйаҥы түстүөҕэ. Саамай сүрүнэ – дьон көһөн барыытын тохтотуоҕа. «Субу курдук сири босхо биэрии региону сайыннарыы элбэх инструменнарыттан биирдэстэрэ. Өрөспүүбүлүкэ киллэрбит уларытыылара, көннөрүүлэрэ аахсыллан, сокуон олоххо киирэригэр эрдэттэн бүк эрэллээх этим. Мөлүйүөн да буолбатар, төһө эрэ киһи Саха сиригэр син биир кэлиэҕэ. Уһук Илиҥҥэ гектар сири биэрии наадата суох диир дьон норуоту утары бараллар», — диир кини.
Гаврил Парахин хаһаайыстыбаны тэриниигэ бэлэм инфраструктуралаах сири биэрэр туһунан ирдэбилгэ толору сөпсөһөр. Сири туһаҕа таһаарааччыларга үп-харчы өттүнэн өйөбүл уонна кытаанах хонтуруол баар буолуохтааҕын ыйар.
