Бу сыл балаҕан ыйыттан доруобуйаларынан хааччахтаах дьон өрөспүүбүлүкэтээҕи уопсастыбаларын бэрэссэдээтэлин солбуйааччынан ананан үлэлээн эрэр, Дьааҥы сирин күүстээх санаалаах, инникигэ сырдык көрүүлэрдээх уола Гаврил Чемоханов бу күннэргэ төрөөбүт дойдутугар кэлэ сырытта. Борбуйун кҕтҕхпүт Дьааҥы куоратын олохтоохторун кытта көрүстэ. “Ганя оҕо эрдэҕиттэн кинигэни таптаан ааҕааччы. Ол иһин куоракка кэлээт аан бастаан бибилэтиэкэҕэ сырытта”, – диир бу тэрээһин модераторынан буолбут куорат кылаабынай бибилэтиэкэрэ Анна Васильевна Слепцова.
Гаврил Чемоханов киэҥ эйгэҕэ «Битва блогеров» кыайыылааҕын быһыытынан биллибитэ. Соторутааҕыта кини төрөөбүт дойдутугар сылдьан уопсастыбаннаһы кытта көрүстэ. Тэрээһиҥҥэ куорат дьаһалтатын баһылыга Евгений Александрович Потапов, олохтоох балыыһа кылаабынай бырааһа Евгения Николаевна Варламова, социальнай үлэһит Анастасия Иннокентьевна Горохова уонна олохтоох нэһилиэнньэ кыттыыны ылла. Дьокуускайтан кэлэ сылдьар Дария Гаврильевна Слепцова эдэр, эрчимнээх биир дойдулааҕа Гаврил Александрович саҕалаан эрэр үлэтигэр үтүө баҕа санаатын эттэ.
Гаврил Александрович элбэх санаалары, этиилэри бэлиэтэннэ. Уһун кэмнэргэ ыалдьан инбэлииккэ тахса сатаабыта ыраатан эрэр, 50 саастаах Семен Васильевич Слепцов кыһалҕатыгар көмөлөһүөх буолла. Хоту дойдуга олорор инбэлиит дьон кыһалҕалара үгүс. Эмп, айан боппуруостара элбэхтик туруоруллалларын, кэлэр сыл олунньу ыйыгар кэмпириэнсийэ оҥорор былааннааҕын уонна инники үлэтин соруктарын сырдатта. “Доруобуйаларынан хааччахтаах дьону кытта үлэҕэ Дьааҥым улууһа өрөспүүбүлүкэ таһымыгар намыһах көрдөрүүлээҕиттэн аан бастаан манна, дойдубар кэллим, куратор буолуоҕум. Инбэлииттэр кыһалҕаларын өйдүүр, амарах сүрэхтээх лиидэр талыллан, уопсастыбаннай тэрилтэлэри кытта ыкса ситимнээхтик, ситиһиилээхтик үлэлииригэр баҕарабын”, – диэн санаатын эттэ. Салгыы улуус киинигэр туһааннаах тэрилтэллэр үлэһиттэрин кытта көрсүһүүгэ аныгы олох ирдэбиллэригэр олоҕурбут үлэ соруктарын тула кэпсэттэ.
«Битва блогеров» күрэххэ кыайыыгар бэриллибит кыбартыыра дьылҕата хайдаҕый?» — диэн ыйытыкка: “Устуудьуйа кыбартыыра. Бу дьиэни атыылаан, эбии өрөспүүбүлүкэттэн көмөлөһүннэрэн, ол үбүнэн сир учаастагын ылан, бырайыак быһыытынан бүөрдэринэн трансплантациялаах уонна диализтаах дьоҥҥо аналлаах социальнай дьиэ тутар баҕалаахпыт. Доруобуйаларынан хааччахтаах дьон бэйэлэрэ бэйэлэригэр сылдьаллар, олор истэригэр эдэр киһи элбэх”, – диэн хоруйдаата.
Дьааҕылар эр санаалаах биир дойдулаахтара Гаврил ылсыбыт үтүө дьыалатыттан биирдэрэ — элбэх оҕолоох ыалга көмөлөһүү. “Ханнык да түгэҥҥэ киһи олоҕу кытта тэҥҥэ хаамсыахтаах, түөрт истиэҕэ бүгүө суохтаах”, — диэн этэр. Итини кини Европа уонна Италия чөмпүйэнээттэригэр уонна Польшаҕа ыытыллыбыт диализтаах дьоҥҥо аналлаах норуоттар икки ардыларынааҕы күрэхтэргэ кыттан, 2 кыһыл көмүс, 4 үрүҥ көмүс, 1 боруонса мэтээллэри ылан кэлбитэ кэрэһэлиир.
«Мин кыайыыларбар дьааҥылыы майгым, характерым туһалыыр дии саныыбын», – диир Битва блогеров» күрэх кыайыылааҕа, Дьааҥы уола Гаврил Чемоханов.
Ааптар: Боотто АСХААРАП
