Москваҕа түмүктэммит футболга аан дойду чөмпүйэнээтин түмүгүнэн, Арассыыйа сүүмэрдэммит хамаандатын оонньооччуларыгар спорт үтүөлээх маастардарын аатын иҥэрии тула араас санаа этилиннэ.
Волейболга аан дойду икки төгүллээх чөмпүйүөнэ, Олимпийскай оонньуулар икки төгүллээх призердара Екатерина Гамова дойдуга спортсменнар ситиһиилэригэр дьиибэ сыһыан баарын ыйда. Ким эрэ бу үрдүк ааты аан дойдуга биитэр олимпийскай оонньууларга бастаатаҕына, оттон ким эрэ аан дойду чөмпүйэнээтигэр финал ¼ таҕыстаҕына ылар диэн туран, маннык сыһыан спорт үтүөлээх маастара аат суолтатын түһэрэрин ыйда.
Улахан теннискэ 2000 сыллааҕы олимпийскай чөмпүйүөн, «Ролан Гаррос» турнир кыайыылааҕа Евгений Кафельников, волейболга олимпийскай оонньуулар чөмпүйүөннэрэ Дмитрий Мусэрскай, футболга ССРС сүүмэрдэммит хамаандатын оонньооччута Евгений Ловчев уо. д. а. Гамова санаатын толору үллэстэллэрин эттилэр.
Ол эрээри ылымматтар эмиэ бааллар. Холобура, олимпийскай оонньуулар чөмпүйүөннэрэ, Судаарыстыбаннай Дуума дьокутаата Светлана Журова. Кини быраабыла хараҕынан спорт үтүөлээх маастардарын аатын футболистарга биэрэр табыллыбатын, ол эрээри быраабылаттан туорааһын баарын, төһө да быраабылаҕа суруллубатаҕын иннигэр, футболистарбыт дьиэтээҕи чөмпүйэнээттэригэр бэйэни харыстаммат оонньууларынан, бэрээдэктэринэн бу ааты ылары ситистилэр диэтэ.
Санатан эттэххэ, спорт үтүөлээх маастара аат иһин футболистарбыт оонньоон бүттэхтэринэ хамнастарын акылаатыгар эбии 20 бырыһыаны аахтарыахтарын сөп. Өскөтүн судаарыстыба тэрийбит спорт оскуолатыгар тириэньэринэн үлэлии киирдэхтэринэ…
Роман Попов, edersaas.ru
