Судаарыстыбаннай Дуума иккис ааҕыыга “Арассыыйа почтатын” уларытан тэрийэр туһунан сокуон барылын ылынна. Ити почта операторын федеральнай судаарыстыбаннай унитарнай тэрилтэттэн публичнайа суох аахсыйалаах уопсастыбаҕа уларытыыны мэктиэлиир.
Иккис ааҕыыга бэлэмнэнии кэмигэр сокуон барылын Арассыыйа Федерациятын субъектарын этиилэрин учуоттаан оҥорбуттара. “Саха сирэ уустук суоллаах-иистээх уонна кыра нэһилиэнньэлээх пууннарга почта салааларын хаалларыыны туруорсар. Ол иһин өрөспүүбүлүкэҕэ уопсастыбаннай истиилэр ыытыллыбыттара”, — диэн бэлиэтээтэ Саха сириттэн Судаарыстыбаннай Дуума дьокутаата Галина Данчикова.
Сокуон барылын ылыныы кэнниттэн өрөспүүбүлүкэ бырабыыталыстыбата толорор былаас федеральнай уорганнарын кытта сокуон нуорматын олоххо киллэриигэ нэһилиэнньэ интэриэһин учуоттаан үлэни ыытыахтаах.
СИА.
