Саха сириттэн Госдумаҕа дьокутаат Галина Данчикова бюджет уонна нолуок кэмитиэтигэр киирдэ. Оттон Федот Тумусов РФ Госдуматын регламеҥҥа уонна парламент тэрээһин үлэтин кэмитиэтин салайааччытын солбуйааччы буолла. Ити туһунан өрөспүүбүлүкэ баһылыгын уонна бырабыыталыстыбатын дьаһалтатын көрдөрөр-иһитиннэрэр тиһиктэргэ управлениетыттан эттилэр.
«Бүгүн бу саалаҕа Арассыыйа 85 субъегын бэрэстэбиитэллэрэ муһуннулар. Кинилэр ортолоругар Крымтан уонна Севастопольтан талыллыбыт дьокутааттар бааллар. Дьон-сэргэ эһиэхэ дьокутаат үрдүк аатын итэҕэйдэ. Быыбар чиэһинэй уонна аһаҕас күрэстэһиигэ ааста», — диэн дойду президенэ Владимир Путин эттэ.
Президент Госдума бэрэстэбиитэллэх былаас быһыытынан үрдүк оруолун, Госдума састааба саҥардыллыбытын эттэ. Сокуону оҥорор үрдүкү уоргаҥҥа уопсастыба, идэлээх сойуустар бэрэстэбиитэллэрэ баалларын кини ойуччу тутан эттэ.
Дьон олоҕор быһаччы дьайар хайыскаларга: үөрэххэ, доруобуйа харыстабылыгар, дьиэ-уот бэлиитикэтигэр, экологияҕа тутаах боппуруостар быһаарыллалларыгар ураты болҕомтотун уурда.
Сэттис ыҥырыылаах Госдума бэрэссэдээтэлинэн Вячеслав Володин талыллынна. Бастакы солбуйааччыларынан Александр Жуков уонна Иван Мельников хааллылар. Солбуйааччыларынан Владимир Васильев, Сергей Неверов, Пётр Толстой, Ирина Яровая, Ольга Епифанова, Игорь Лебедев буоллулар. Ону таһынан Госдума хамыыһыйаларын састааптарын быһаардылар. Маны үөскэтии өссө да салҕанан барар. Сокуонунан көҕүлээһиннэр тула үлэ алтынньы 7 күнүгэр буолар пленарнай мунньахха саҕаланар.
