Саха сирин бырабыыталыстыбатын бэрэссэдээтэлэ Галина Данчикова норуоттар икки ардыларынааҕы «Азия оҕолоро» спортивнай оонньуу түмүгүн таһаарда уонна түөрт сылга биирдэ ыытыллар улахан күрэхтэһии тэрийээччилэригэр махтанна.
«Быйыл Оонньуу 20 сылын туолла. Сороҕор кыайыы өрөгөйүттэн, ардыгар кыайтарыы кыһыытыттан харах уулаах, улахан утарсыылаах күрэхтэһиилэргэ оҕолор хас биирдиилэрэ ситиһиигэ дьулуста. Оҕолор Олимпиадаҕа диэри ситэн-силигилээн тахсалларыгар Оонньуу сүрүн тирэх. Бүгүн «Азия оҕолоро» Оонньуулары аан дойду таһымыгар билиннилэр», — диэтэ премьер-миниистир.
Галина Данчикова өрөспүүбүлүкэ салалтатын уонна тэрийэр бөлөх аатыттан махталы тиэртэ. «Оонньууну сөптөөх таһымҥа ыытар чэпчэкитэ суох этэ. Онуоха ыытыллыбыт үлэни ыалдьыттар бары үрдүктүк сыаналаатылар», — диэтэ кини.
Премьер Монголияҕа буолар кэлэр Оонньуу маннык таһымнаахтык ааһарыгар эрэнэрин эттэ.
