30 Кулун тутар 30.03
  • -16°
  • $ 92,37
  • 99,53

Франция футболга аан дойду чөмпүйүөнэ буолла

10:23, 16 июля 2018
Текст:
Читайте нас на
Яндекс Новости
ЯДВ

Футболу сэҥээрээччилэр ыйы быһа долгуйбут аан дойдутааҕы чөмпүйэнээттэрэ түмүктэннэ. Франция хамаандата Хорватия хамаандатын 4:2 ахсаанынан кыайан, аан дойду чөмпүйүөнүн аатын иккис төгүлүн сүктэ. 

edersaas.ru


Ыалдьааччы санаата

Иннокентий Владимиров,  «Челси» футбол кулуубун сэҥээрээччилэр Саха сиринээҕи уопсастыбаларын бэрэссэдээтэлэ:

—     Бэйэбит дойдубутугар аан дойду чөмпүйэнээтэ үрдүк таһымнаахтык ааста. Арассыыйа хамаандатын оонньууларын көтүппэккэ көрдүм. Арассыыйа Хорватияны кытта оонньообутун олус сөбүлээтим. Кыайыахпыт диэн олох бүтэһигэр диэри эрэммитим. Чөмпүйэнээт саҕаланыытыгар Германия уонна Бразилия бастыыр иһин киирсиэхтэрэ дии саныырым. Кинилэр эрдэ туораан хааланнар, киирсиилэр өссө сытыырхайбыттара. Ол эрэн, Франция хомуур хамаандата күүстээҕэ лаппа биллэр этэ. Бастыахтааҕын бастаата дии саныыбын. Элбэх эдэр футболистар тахсан эрэллэр. Маннык тыҥааһыннаах чөмпүйэнээт хаһан да ыытылла илик диэн бэлиэтии көрдүм.

Аан дойду бастыҥнарын билиммэтилэр  

Чөмпүйэнээт саҕаланыытыгар, дьон барыта Бразилия уонна Германия хамаандалара бастыҥнар диир этэ. Омуна да суох, Бразилияҕа футбол итэҕэл кэриэтэ. Оттон Германия ааспыт чөмпүйэнээт кыайыылааҕа. Ол эрэн, Германия хамаандата бөлөҕөр бүтэһик буолан, футболу сэҥээрээччилэри соһуппута. Бразилия финал 1/4-гэр Бельгия хамаандатын кыайан ааспатаҕа. Чөмпүйэнээт биир бэлиэ түгэнинэн Арассыыйа хамаандата Испания, Египет курдук күүстээх хамаандалары кыайан, финал 1/4-гэр тахсыбыта буолла. Аан дойду чөмпүйэнээтин устуоруйатыгар, биһиги хамаандабыт хаһан да маннык ыраата илик. Оннооҕор аан дойду футболун сулустарыттан турар Хорватия хамаандатын кытта тэҥҥэ оонньоон, кыл- мүччү финал аҥаарыгар ааспатахтара.  Кинилэр быйыл күүскэ эрчиллибиттэрин, хомуллубуттарын уонна эппиэтинэстээхтик сыһыаннаспыттарын көрдөрдүлэр. Футболу ырытааччылар бэлиэтииллэринэн, бу чөмпүйэнээт кэнниттэн  аан дойду бастыҥ кулууптара хас да Арассыыйа футболиһын атыылаһыахтара.

Аан дойду биир бастыҥ оонньооччута Неймар бу да сырыыга сатаммата

Африкаттан сылдьар французтар

Англия хамаандата эмиэ бастакытын аан дойду чөмпүйэнээтигэр төрдүс миэстэҕэ тигистэ. Мин санаабар, үһүс миэстэ буолбут Бельгия хамаандата сэрэбиэйэ табыллыбыта буоллар, финалга тиийиэхтээх этэ. Кинилэр финал аҥаарыгар бастаабыт французтарга баһыйтарбыттара. Франция хамаандата үксүн Африка дойдуларыттан Францияҕа олохсуйбут дьоннортон турар. Кинилэр түргэннэринэн, албастары оҥороллорунан, биир да хамаандаҕа баһыйтарбаттар. Утарсааччыларын барыларын холкутук кыайталаан, чөмпүйэнээт муҥутуур кыайыылаахтарынан буолуохтаахтарын буоллулар. Арассыыйаны туораппыт хорваттар Францияны кыайыахтара диэн элбэх киһи эрэнэр этэ. Ол эрэн, ким күүстээх, ол кыайда.

Франция хамаандатын оонньооччулара

Лука Модрич бастыҥ оонньооччу

Бу чөмпүйэнээт финал 1/4-тэн саҕалаан, Европа эрэ хамаандалара хааланнар, Европа чөмпүйэнээтин курдук буолбута. Финал бастыҥ оонньооччутунан Франция хамаандатын спортсмена, тэлэбиисэргэ баттах суунар шампуну эрэкэлээмэлиир Антуан Гризман ааттанна. Оттон чөмпүйэнээт бастыҥ оонньооччутунан хорват Лука Модрич буолуохтааҕын буолла. Лука Модрич Югославия сэриитин кэмигэр улааппыт оҕо. Киниэхэ көмүс мээчиги Арассыыйа бэрэсидьиэнэ Владимир Путин туттарда.

Антуан Гризман финал бастыҥ оонньооччута

Лука Модрич — чөмпүйэнээт бастыҥ оонньооччута

Николай ПОПОВ, «Саха сирэ» хаһыат, edersaas.ru

Следите за самым важным и интересным в Telegram-канале и WhatsApp-группе ЯСИА