Сойуустары уонна уопсастыбаннай тэрилтэлэри түмэр холбоһук «Биир ньыгыл Россия» баартыйа ыытар барыллаан куоластааһыныгар дьону-сэргэни көхтөөхтүк кыттарга ыҥырар. Саха сирин хас биирдии олохтооҕо праймеризка кыттара туох суолталааҕын туһунан ХИФУ ректора Евгения Михайлова санаатын үллэһиннэ.
«Уһук Илиҥҥэ олохтоох дьон ахсаана киин регионнардааҕар хас эмэ бүк аҕыйах. Ол иһин, Саха сирэ биир мандаата суох хаалар куттала баар. Маннык быһыы-майгы 2003 сыллаахха үөскүү сылдьыбыта. Үс субъектан баартыйа испииһэгинэн Госдумаҕа бэйэ бэрэстэбиитэллэрин киллэрии, ыам ыйын 22 күнүгэр ыытыллар барыллаан куоластааһын түмүгүнэн, кандидат хас куолаһы ыларыттан быһаччы тутулуктанар», — диэн Евгения Михайлова СИА корреспонденыгар эттэ.
Күһүн ыытыллар быыбарга Саха сирин олохтоохторо баартыйа да, биир мандааттаах уокуруктан да бэйэ кандидатын иһин куоластыыр кыахтаахтар. Ыам ыйын 22 күнүгэр ыытыллар барыллаан куоластааһын түмүгүттэн «Биир ньыгыл Россия» баартыйаттан кандидаттар талыллыахтара. Баартыйа испииһэгэр өрөспүүбүлүкэ бэрэстэбиитэлэ хаһыс миэстэҕэ тиксэрэ Саха сирин олохтоохторо праймеризка кытталларыттан быһаччы тутулуктанар. Оттон ол кыаллыбатаҕына, территориятааҕы испииһэк инники күөнүгэр атын регионнартан эбэтэр киинтэн туруоруллубут дьон ааһыахтарын сөп.
«Өрөспүүбүлүкэ олохтоохторо федеральнай парламеҥҥа бэрэстэбиитэллээх буолар хайдахтаах курдук наадатын дьэҥкэтик өйдүөх тустаахтар. Элбэх мөккүөрү таһаарбыт Уһук Илиҥҥэ гектар сири босхо биэрии, эбэтэр регионнар бүддьүөтүнэн хааччыллыыларын барыларыгар биир тэҥ оҥоруу сокуоннара хайдах курдук түргэнник олоххо киирбиттэрин бары истэ-билэ сылдьабыт. Субъектар этиилэрэ сорох-сороҕор федеральнай парламент таһымыгар тиийбэккэ да хаалаллар. Онон биһиги интэриэспитин Госдумаҕа туруулаһар, туруорсар дьокутааттары талыахтаахпыт. Маныаха биһиги кыһалҕалабытын үчүгэйдик билэр уонна ону федеральнай киин таһымыгар хайдах туруорары билэр дьон наадалар», — диир ректор.
«Праймериз кыттыылаахтара уопсастыбанньыктар, суруналыыстар, бизнесменнэр үчүгэйдэр, ол эрээри көмүскэллээх буолар туһуттан дьиҥнээх профессионаллары — Галина Данчикова уонна Юрий Куприянов иһин куоластыахтаахпыт. Кинилэр өрөспүүбүлүкэ туһугар көдьүүстээхтик үлэлиир, Саха сирин интэриэһин куруук көмүскүүллэрин туоһулаабыт дьон», — диэтэ Евгения Михайлова.
«Биир ньыгыл Россия» баартыйа праймериһа ыам ыйын 22 күнүгэр сарсыарда 8.00 чаастан киэһэ 20.00 чааска диэри ыытыллар. Куоластааһыҥҥа Россия хас биирдии олохтооҕо кыттар бырааптаах. Бэйэ олорор сиринэн быыбардыыр учаастагын PG.ER.RU. саайтка булуохха сөп.
This post was published on 17.05.2016 17:05 17:05