Өлөөн олохтоохторун олохторун-дьаһахтарын тупсарыыга, нэһилиэнньэни хааччыйар салааҕа идэтийэн дьарыктанар үлэ кэлэктииптэриттэн биирдэстэринэн  «Эрэл» хааччахтаммыт эппиэтинэстээх тэрилтэ (директор Татьяна Кладкина) буолар. «Сардаҥа» хаһыат эрэдээксийэтэ тэрилтэ кыстыкка киирии үлэтин туох-хайдах саҕалаабытын уонна ханнык соруктар туралларын туһунан сураста. 


Өлөөн улууһугар элбэх тэрилтэ, олорор дьиэ уһун кыһыны этэҥҥэ туоруура сылааһы хааччыйар тэрилтэттэн быһаччы тутулуктаах. Кыстыкка бэлэмнэнии туһунан «Эрэл» хампаанньа директора Татьяна Кладкина кэпсиир.

– Нэһилиэнньэни хааччыйыы эйгэтигэр үлэлиир УК «Эрэл» хампаанньа балаһыанньата билигин хайдаҕый?

– «Эрэл» УК тэрилтэлэргэ уонна нэһилиэнньэҕэ өҥөнү оҥоруу салаатыгар 2009 сылтан саҕалаан идэтийэн үлэлиир. Билиҥҥи туругунан 33 үлэһиттээхпит, ол иһигэр Өлөөн сэлиэнньэтигэр 18, Ээйиктээҕи производственнай учаастакка (ыст. маастар А.Е. Скрыбыкин) — 11, Дьэлиҥдэтээҕи учаастакка (ст. оробуочай Т.А. Николаева) — үс үлэһит уонна Харыйалаахтааҕы учаастакка биир үлэһит сыһыарыллан үлэлииллэр. Киин баазабыт Өлөөн сэлиэнньэтигэр кииннэнэн үлэлиибит, икки  гараастаахпыт, Административнай дьиэлээхпит уонна 16 миэстэлээх таас баанньыктаахпыт. Бу күннээҕи туругунан сүрүн үлэбитин толорорго анаан тоҕус анал тиэхиньикэлээхпит, ол иһигэр Өлөөн сэлиэнньэтигэр— биэс, Дьэлиҥдэ сэлиэнньэтигэр — икки, Харыйалаах сэлиэнньэтигэр — икки анал тиэхиньикэлэр үлэлииллэр.

– УК «Эрэл» хампаанньа тэрилтэлэри уонна нэһилиэнньэни хааччыйыыга ханнык сүрүн үлэ көрүҥнэрин дуогабарынан толороруй?
– Бастатан туран биһиги тэрилтэбит Солоҕоон национальнай нэһилиэгин Эйик сэлиэнньэтин тэрилтэлэрин уонна олорор дьиэлэрин итиинэн хааччыйыыга муниципальнай сакааһы толорууга үлэлиир. Бу күннээҕи туругунан нэһилиэккэ баар 6 тэрилтэ уонна нэһилиэк олохтоохторун бары дьиэлэригэр итиинэн хааччыйыыны ситистибит. Маны тэҥэ Өлөөн, Харыйалаах, Дьэлиҥдэ сэлиэнньэлэрин тэрилтэлэрин уонна нэһилиэнньэни техническай уунан хааччыйыыга идэтийэн үлэлиибит. Толору хааччыллыылаах муниципальнай уонна чааһынай дьиэлэри көрүү харайыы-өҥөтүн толоруу сылтан-сыл таһыма улаатан иһэр.

Муниципальнай сакааһы толоруу бэрээдэгинэн Өлөөн сэлиэнньэтигэр баанньыгы үлэлэтэбит уонна «санитарнай очистка» өҥөтүн оҥоробут. Маны тэҥэ тэрилтэлэргэ уонна нэһилиэнньэҕэ олохтоох тутуу матырыйаалларын тиэйэн биэрии үлэлэрин анал сайаапкаларынан толоробут.

– Бу икки үлэ көрүҥнэрэ урут уруккуттан тэрилтэҕэ ночооту эрэ биэрэр салаалар.  Ороскуоккутун хайдах саптаҕытый?

– Нэһилиэнньэ олоҕор олус наадалаах өҥөлөр буоланнар олохтоох бэйэни салайыныы дьаһалтата анал тус сыаллаах муниципальнай бырагыраамма оҥорон сүрүн ороскуоппутун сабыыга көмөлөһөр уонна сорох ороскуоттары тэрилтэ сүрүн үлэтинэн киирэр дохуот суотугар сабабыт.

– Ээйик сэлиэнньэтэ оройуон кииниттэн саамай ыраах сытар. Манна итиинэн хааччыйыыга туох ситиһиилэр уонна ыараххаттар баалларый?
– Оройуон дьаһалтатын көмөтүнэн кэлин үс сылга Ээйиктээҕи кыбартаалынай хочуолунай анал реконструкцияны баран, саппаас хочуол туруоруллан, итиини биэрэр турба ситимэ бүттүүн уларытыллан, нефтескладка эбии икки 100 м3 емкостьтар туруоруллан, техническэй нормативка эппиэттиир буолара хааччылынна. Суол-иис суоҕунан, оттугу кылгас, кыһыҥҥы массыына суола арыллыбыт кэмигэр тиэллэринэн, таһаҕас таһыытын үбүлээһиҥҥэ ыарахаттары көрсөбүт.

Саха Өрөспүүбүлүкэтин Ил Дарханын сорудаҕынан тыа сиригэр тутуллар дьон олорор дьиэлэрэ толору хааччыллыылаах буолууларын ситиһиигэ кэлин сылларга Өлөөн оройуонугар улахан таһымнаах үлэ барда. Бу күннээҕи туругунан оройуон үрдүнэн төһө дьон олорор, толору хааччыллыылаах дьиэлэрин көрүүгэ-харайыыга дуогабарынан ылан үлэлэһэ сылдьаҕыт, ол иһигэр биирдиилээн сэлиэнньэлэринэн?
– Бу дьыл сэтинньи ый 1 күнүнээҕи туругунан оройуон үрдүнэн толору хааччыллыылаах дьон олорор дьиэлэрин көрүүгэ-харайыыга 33 дьиэни, ол иһигэр 171 квартираны ылан үлэлии олоробут. Ол иһигэр Өлөөн сэлиэнньэтигэр 20 дьиэни, ол иһигэр 138 квартираны; Дьэлиҥдэ сэлиэнньэтигэр 3 дьон олорор дьиэлэрин, ол иһигэр 6 квартираны; Харыйалаах сэлиэнньэтигэр 10 дьон олорор дьиэлэрин, ол иһигэр 27 квартираны дуогабарынан өҥөнү оҥорууга ылан үлэлэһэ сылдьабыт.

– Ханнык баҕарар тэрилтэ ситиһиилээх буолуута үлэһиттэн улахан тутулуктаах. Бастыҥ дьоҥҥун бэлиэтиэҥ дуо?
– Биһиги тэрилтэбит иннигэр туруоруллубут былааннары олоххо киллэриигэ үтүө суобастаахтык үлэлии сылдьар дьоммут баһаам. Суоппардар  Э.В. Ушманов, П.Р. Васильев , Н.Д. Степанов , А.Э. Ушманов, Ээйик учаастагын маастара А.Е. Скрыбыкин, хочуолунай хаһаайыстыба үлэһитэ Н.К. Адамов, нэһилиэнньэҕэ өҥөнү оҥоруу эйгэтин үлэһиттэрэ П.И. Винокуров, Г.Х. Христофоров  уонна да атын бастыҥ үлэһиттэрбит элбэхтэр.

Кэпсэттэ Н. СТРУЧКОВ

0
0
comments powered by HyperComments