Анаабыр Үрүҥ Хайатыгар эр киһи үксэ балыктыыр. Кыһын муус аннынан илимнииллэр. Муус халыҥаатаҕына, киһи эрэ барыта санаммат. Сааһыары букатын аҕыйыыллар. Балык даҕаны сэдэхтик иҥнэр буолар.
“Билигин эбэбит мууһа икки миэтэрэттэн тахса халыҥнаах, — диир Гаврил Спиридонов. – Күөл мууһа өссө халыҥ. Нэдиэлэҕэ үлэм быыһыгар илимнэрбин иккитэ-үстэ көрөбүн. Уһаттахха, олус халыҥаан, үлэтэ элбиир. Күһүн муус туран, киһини уйар буолаатын кытта саҕалыыбыт. Ол кэмҥэ балыга элбэх буолар. Сааһыары лаппа аҕыйыыр, муораҕа киирэр”.
Гаврил Николаевич олохтоох ДЭС-кэ начаалынньыктыы сылдьыбыт, билигин маастардыыр эбит. Кини этэринэн, хайа буора-тааһа сиҥнэн, өрүс төрдө сылтан сыл бүөлэнэн, чычааран иһэрэ балык хамныырыгар сабыдыаллаабыт итиэннэ бырамыысыланнас буулуоҕуттан Анаабыр өрүс уута биллэрдик киртийбит. “Урут эбэбит уута маннык саһарбат этэ”, — диир.
Балыксыт Гаврил сарсын улахан тыал түһээри гыммытын ойбонун алларан баран, мууһун сүүрдүүрүгэр хаардаах бөлөнөх тахсарыттан тута биллэ. “Бу хаардаах уу кэлэр. Манныкка балык тимирэн, сүтэн хаалар. Муораҕа тыалырдаҕына хаардаах ууну ытыйан аҕалар. Биһиэхэ муора 6-лыы чаас буола-буола түллэн, уутун ыган таһаарар”, — диэн быһаарар.
Кырдьык, кини этэрин бигэргэтэрдии, күлэ турбут күммүт былыт кэннигэр саһан-кирийэн хаалла уонна үс илим тухары балык да аанньа туппатах, аҕыйах сыалыһар уонна биир-икки муксуун кэллэ. Гаврил Николаевич сылыктаабытын курдук, сарсыныгар сарсыардаттан күүстээх тыал түһэн, биир хонон баран Сааскылаахха төннүөхтээх дьон айаммыт суола бүөлэнэн, хаайтаран, өссө икки хоннубут.
Онон биһиги, куорат дьоно, балыксыты кытта күн аҥаара тэҥҥэ сылдьыһан, Үрүҥ Хайа ыаллара ыалдьыты эмис тоҥ балыгынан күндүлүүр остуоллара чэпчэкитик тэриллибэтин эппитинэн-хааммытынан биллибит. Илиигин ууга уктуҥ даҕаны балыгы орообоккун. Тоҕус көлөһүҥҥүн тохтоххуна – аһыыгын. Ону бу Гаврил Спиридонов курдук хоһуун, уопуттаах балыксыттар эрэ кыайа-хото туталлар.
Василий НИКИФОРОВ, «Саха сирэ» хаһыат, edersaas.ru
Мария ВАСИЛЬЕВА (СИА) хаартыскаҕа түһэриитэ.
