Дьокуускай куоракка Сайсары оройуонугар баар «Оскуола эйгэтэ» бибилэтиэкэ ХИФУ экология кафедратын кытта Экология сылын чэрчитинэн бииргэ үлэлииргэ сөбүлэҥ түһэристилэр. Бу туһунан бибилэтиэкэ үлэһитэ Ольга Эртюкова иһитиннэрдэ.
—Анал сыл чэрчитинэн, сыл устатыгар ХИФУ преподавателлэрэ бибилэтиэкэҕэ кэлэн эко уруоктары, лекторийдары тиһиктээхтик ыытыахтара. Ону сэргэ «ЭКОВООК», «Люблю тебя, Туймаада, в любое время года» диэн, о.д.а. бырайыактар чэрчилэринэн бииргэ үлэлиэхпит, тэрээһиннэри тэрийиэхпит. Экология сылын чэрчитинэн, бибилэтиэкэҕэ Сайсары уокуругуттан социальнай үлэ испэсэлииһэ Нарыйа Черемкина, технадзор кылаабынай испэсэлииһэ Ульяна Семенова, ХИФУ экология кафедратын сэбиэдиссэйэ, биология наукатыгар кандидат, доцент Прасковья Гоголева, уопсастыбанньык Антон Васильев, Саха политехническэй лиссиэй мусуойун сэбиэдиссэйэ Гея Корнилова, ДьТХА устудьуоннара, ааҕааччылар көрсөн сэргэх кэпсэтии ыытылынна. Үүммүт сыл чэрчитинэн ким туох этиилээҕин, туох үлэни ыытар былааннааҕын, баҕалааҕын сэһэргэстибит. Уопсастыбанньык Антон Васильев сири-уоту ыраастык тутуу, айылҕаны таптааһын бу киһи култуурата буоларын бэлиэтээн туран, «Ыраас Сайсары» диэн акция ыытар баҕалааҕын иһитиннэрдэ, эдэр ыччаты ыҥырда. Дьон санаатын түмэ тардыбыт кэпсэтии өргө диэри буолла. Сыл устата ыытыллар тэрээһиннэри сэргэ, бибилэтиэкэҕэ доргуччу ааҕыы күнүн тэрийиини, араас куонкурустары, «Мусор, до свидания» акцияны Өлүөнэ эбэ күнүгэр ыытарга, о.д.а. үлэни-хамнаһы былааннаатыбыт. Бу күн ыалдьыттар тулалыыр эйгэҕэ анаабыт кинигэ быыстапкатын кэрэхсээтилэр, санааларын үллэһиннилэр — диэтэ.
