28 Кулун тутар 28.03
  • -12°
  • $ 92,59
  • 100,27

Егор Филиппов – Дыгын Оонньууларын кыайыылааҕа!

15:41, 27 июня 2016
Текст:
Читайте нас на
Яндекс Новости
ЯДВ

Икки күн устата Туймаада Ыһыаҕын кэмигэр дьон-сэргэ болҕомтотун муҥутуур киинигэр турбут Дыгын Оонньууларыгар чэпчэки атлетикаҕа Россия спордун маастара, Хаҥаластан төрүттээх Егор Филиппов тэҥнээҕин булбата. Киниэхэ «УАЗ» массыынаны бириис быһыытынан биэрдилэр.


«Оонньуу кыттыылаахтара бука бары чиэһинэйдик уонна дьоһуннук күрэхтэстилэр. Күрэстэһии муҥутуур улахан. Хас биирдии көрүҥҥэ сылааны умнан туран киирсии буолла. Биллэн турар, Оонньуу түһүлгэтэ, тренерим Иван Белолюбскай кыайыыга сүрүн олугу уурудулар», — диэтэ кыайыылаах.

«Үс төгүл үс» ыстаҥаҕа Егор Филиппов барыларыттан ордугу — 37,51 м. ыстанна. Иккис миэстэни Усуйаанаттан Алексей Козлов ылла. Кини көрдөрүүтэ 32,92 м, оттон үсүһү — Петр Старостин (32,84 м).

Петр Старостин тутум эргиирин 58-та оҥорон барыларын баһыйда. Таатта улууһуттан кыттыбыт Николай Матаннанов быраабыланы кэспитин иһин, кини көрдөрүүтэ ааҕыллыбата. Бүтэһигэр кини бүтэһик миэстэни ылла.

Мас тардыһыытыгар аан дойду чөмпүйүөнэ Дмитрий Поповка ким да тэҥнэспэтэ. Биир дойдулааҕа Иван Бололюбскайдыын күөн көрүстэ. Көрсүһүү 2:0 ахсаанынан түмүктэннэ.

Оонньуу бүтэһик күнэ оҕунан ытыыттан саҕаланна. 60-тан 59 ахсааны ылбыт Дмитрий Попов кыайыах курдук этэ. Ол эрээри, кини Егор Филипповтан 2 ахсаанынан хаалла.

Дыгын Оонньууларын сэттэ төгүллээх кыайыылааҕа Иван Белолюбскай хапсаҕайга үрдүк мастарыстыбыаны көрдөрдө. Кини Алексей Козлову кыайда. Егор Филиппов алтыс миэстэни ылла.

Сүүрэн иһэр кыыһы эккирэтиигэ Петр Старостин барыларын баһыйда, кини кэнниттэн Егор Филиппов, онтон Намтан кыттыбыт Артем Варданян үһүс буолла.

Тааһы көтөҕөн илдьиигэ саҥа рекорд олохтонно. Дьулустаан Ноговицын 115 кг.тааһы 151,88 м диэри илтэ. Антон Тойтонов киниттэн 20 м. хаалла.

Дыгын Оонньууларын түмүгэ:

1 миэстэ — Егор Филиппов (Хаҥалас);

2 миэстэ — Алексей Козлов (Усуйаана);

3 миэстэ — Артем Варданян (Нам);

4 миэстэ — Алексей Кутуков (Нам);

5 миэстэ — Дмитрий Попов (Уус Алдан);

6 миэстэ — Антон Тойтонов (Нам);

7 миэстэ — Петр Старостин (Чурапчы);

8 миэстэ — Иван Белолюбскай (Уус-Алдан);

9 миэстэ — Дьулустаан Ноговицын (Горнай);

10 миэстэ — Любомир Николаев (Үөһээ Бүлүү);

11 миэстэ — Андрей Тюнгюрядов (Нам);

12 место — Николай Матаннанов (Таатта).

Следите за самым важным и интересным в Telegram-канале и WhatsApp-группе ЯСИА