Владимир Путин салайааччылаах Арассыыйа делегациятын Японияҕа сырыытын чэрчитинэн судаарыстыбалар икки ардыларынааҕы официальнай тэрээһиҥҥэ Егор Борисов кытынна.
Егор Борисов РФ салайааччыларын уонна бырабыыталыстыба чилиэннэрин, наука, бизнес бэрэстэбиитэллэрин уонна Уһук Илин икки губернатордарын Олег Кожемяконы (Сахалин уобалаһа) уонна Вячеслав Шпорты (Хабаровскай кыраай) кытта Владимир Путин уонна Синдзо Аэбэ оробуочай эбиэттэригэр ыҥырыллан сырытта.
Икки дойду салайааччылара хардарыта дьайсыылаах бииргэ үлэлээһин сүрүн өрүттэригэр тохтоотулар. Онно туризм, виза режимин судургутуу, атыы, экономика эйгэлэригэр бииргэ үлэлиир бырайыактары ырыттылар.
Ил Дархан Арассыыйа-Япония Бизнес-Диалогтарыгар кытынна. Путин Арассыыйа уонна Япония сибээстэрин бөҕөргөтүүгэ интэриэстээҕин ойуччу тутан эттэ. «Кэлиҥҥи сылларга биһиги дойдуларбыт икки ардыларыгар табаар эргиирэ кыччаабытын бэлиэтээбиппит. Маны бигэтик улаатыннарар туһунан биир санааҕа кэллибит. Маныаха бырабыыталыстыба уонна бизнес эргимтэтэ күүрүүлээхтик үлэлиэхтээхтэр», — диэтэ президент.
«Уһук Илиҥҥэ Япония бизнесменнэрэ кытталларын биһириэх этибит. Манна инникилээн сайдар 13 сир-уот үлэлиир. Омук дойдутун инвестордарыгар кэккэ чэпчэтиилэр бааллар: саҥаны оҥорон таһаарыыга ураты усулуобуйа үөскэтиллэр, нолуокка чэпчэтии, инфраструктураҕа кыттыы кыаллымтыа буолар», — диир Путин.
Егор Борисов тэрээһиннэр тустарынан санаатын үллэстэригэр, кэпсэтиһиилэр чэпчэки буолбатахтарын, ол эрээри көдьүүстээхтэрин ыйда: «Арассыыйа уонна Япония икки ардыларынааҕы сыһыан бигэтийдэ, инникитин хардарыта барыстаах уонна үтүө эрэ өттүгэр сайдыахтаах. Мин көрүүбэр, биһиги Уһук Илиммит итини өйүүр. Барыта Путин уонна Абэ санаабыттарын хоту буоллаҕына, балысхан уларыйыылар да, бэлиитикэ да үтүө өттүгэр уларыйыахтара», — диир кини.
«Дьыалабыай эргимтэ форумнарын кэмигэр 80-тан тахса араас сөбүлэһиигэ илии баттанна. Итинтэн сороҕо биһиги региоммутун быһаччы таарыйар», — диэтэ Борисов.
Егор Борисов бэлиэтииринэн, РФ энергиэтикэҕэ уонна Япония экономикаҕа, атыыга уонна промышленноска министиэристибэлэрэ Эльгатааҕы чох комплексын сайыннарыыны сүрүннүүр меморандумҥа илии баттааһыннара ураты суолталаах. Оччотугар чох комплекса инникилээн сайдар 14-с сиргэ-уокка кубулуйар толору кыахтаах.
СӨ бырабыыталыстыбата кыттыылаах бииргэ үлэлээһиҥҥэ суоттаныы түөрт дуогабара түһэрсилиннэ. Онно «РусГидро» ПАО уонна Япония NEDO корпорацияны кытта сайдыыга туһуламмыт үлэлэрин, Бүлүү сиригэр-уотугар «Эрнст энд Янг Адвайзори Ко. Лтд.» компанияны кытта хардарыта дьайсыылара, энергиэтикэ эйгэтигэр «Кавасаки Хэви Индастриз Лтд.», «Соджиц Корпорейшн» уонна «ЯТЭК» ОАО бииргэ үлэлэрэ киирэ сылдьаллар. Ону таһынан Дьокуускайга «Хоккайдо Корпорэйшн Ко». Лтд» сылы эргиччи үлэлиир теплицаны олоххо киллэриитэ баар.
Чох промышленноһыгар «Колмар» ХЭТ уонна «Марубени Корпорейшн» бииргэ үлэлиир дуогабары түһэристилэр.
«Предпринимателлэр сыһыан тупсуутугар эрэнэллэрэ оруннаах. Онно Саха сирэ дьоһун миэстэни уонна көхтөөх кыттыыны ылыа», — диэтэ Ил Дархан.
Эһиил Япония бизнес эргимтэтин улахан делегацията Саха сиригэр кэлэрэ былааннанар.
