«Россия-1» ГТРК «Саха» телеханаалыгар быһа эфиргэ Томмоттон Марина Костромина Егор Борисовка ыйытыы биэрдэ. Онно Ил Дархан өрөспүүбүлүкэни медицина үлэһиттэринэн толору хааччыйыыга былаас ыытар үлэтин кэпсээтэ.
«Доруобуйа харыстабылын эйгэтигэр элбэх үлэ ыытыллар, ол иһигэр тэрээһин үлэлэргэ эмиэ. Биһиги «эйэҕэс медицинаны» тэрийиэхтээхпит, ол аата медицина үлэһиттэрэ ыарыһахтарга истиҥник уонна болҕомтолоохтук сыһыаннаһыахтаахтар. Бу туруоруллубут соругунан тустаах министиэристибэ дьарыктанар. Үгүс нэһилиэнньэлээх пууннарга бу хайысха биллэрдик тубуста. Ити эрээри билигин даҕаны биирдиилээн технология, быраастар уонна медперсонал тиийбэт. Чуолаан Томмот боппуруоһугар мин кылаабынай бырааһы кытта кэпсэтиэм«, — диэтэ Егор Борисов.
Кини этэринэн, ХИФУ уонна медколледж баазаларыгар медицина үлэһиттэрин бэлэмнээһин күүскэ, былааннаахтык барар: «Икки кыһалҕаны бэлиэтиэм этэ. Бастатан туран, уопсай эмтиир быраастарынан толору хааччыллан олорор буоллахпытына, биирдиилээн чопчу хайысхалаах быраастар тиийбэттэр. Иккиһинэн, үөрэх ылбыт исписэлиистэр тыа сиригэр бара сатаабаттар. Эдэрдэри көҕүлүүр сыалтан биһиги оройуоннарга барар медицина үлэһиттэрин өйүүр бырагыраамалардаахпыт: «Сельский доктор», «Сельский фельдшер» уонна да атын. Ити эрээри бары өттүнэн усулуобуйалаах Мииринэй, Нерюнгри, Алдан оройуоннарыгар кадрдар тиийбэттэр. Тоҕо диэтэххэ, урукку өттүгэр ити муниципалитеттарга медицинаны онно үлэлиир бөдөҥ тэрилтэлэр хааччыйаллара. Хайдах курдук кинилэр бырагыраамаларын аҕыйатааттарын кытта, медицина үлэһитэ тиийбэт буолла. Бырабыыталыстыба бу боппуруоска ылыста, балаһыанньа онон тупсуоҕа«.
Маны сэргэ, Ил Дархан билигин өрөспүүбүлүкэҕэ перинатальнай уонна онкологическай кииннэр киириилэригэр туһаайыллыбыт медицина үлэһиттэрин бэлэмнээһин күүскэ бара турарын эттэ.
