Ытыктабыллаах учууталлар, педагогтар уонна бэтэрээннэр! Эһигини идэлээх бырааһынньыккытынан – Учуутал күнүнэн эҕэрдэлиибин!
Дойдубут уонна өрөспүүбүлүкэбит инникитэ: наука, экономика салааларын, олох-дьаһах эйгэтин сайдыылара – үксүгэр эһигиттэн, учууталлартан тутулуктаах. Кэлэр көлүөнэлэр уопсай үөрэҕи ылалларыгар, кинилэр олоҕу көрүүлэрэ олохсуйарыгар уонна олоххо суолларын торумнаналларыгар хайдах акылааты түһэрэргититтэн.
Хас биирдиибит ытыктыыр, таптыыр учууталлардаахпыт. Кинилэр биһигини ааҕарга, суруйарга, үтүөҕэ итэҕэйэргэ, Ийэ дойдуну таптыырга, олоххо бэйэ аналын буларга үөрэппиттэрэ. Учууталбытыгар махталбытын олохпут устата сүрэхпитигэр илдьэ сылдьабыт. Ол да иһин Учуутал күнэ – хас биирдиибитигэр чугас уонна күндү бырааһынньык.
Өрөспүүбүлүкэҕэ анал идэлээх педагогическай кадрдары өйөөһүҥҥэ, үөрэхтээһин эйгэтин материальнай-техническэй уонна методическай базатын саҥардыыга, тупсарыыга утумнаах үлэ ыытыллар. Учууталлары олорор дьиэнэн хааччыйыыга, хамнастарын уонна социальнай статустарын үрдэтиигэ болҕомто ууруллар. Ол курдук, “Саха Өрөспүүбүлүкэтигэр 2012-2019 сылларга үөрэҕириини сайыннарыы” судаарыстыбаннай бырагырааманы үбүлээһиҥҥэ өрөспүүбүлүкэ 2017 сыллааҕы бүддьүөтүгэр 30-ча миллиард солкуобайдаах үп көрүллүбүтэ.
Бүгүн өрөспүүбүлүкэ педагогтарын иннигэр күрэстэһэр кыахтаах көлүөнэлэри үөрэтэн, иитэн таһаарар сүрүн сорук турар. Хас биирдии учуутал үөрэнээччилэрэ билиилээх, дьоҕурдаах, иннилэрин көрүнэр, эппиэтинэстээх личностар буола үүнэллэригэр, кэлин ылсыбыт дьыалаларыгар үрдүк ситиһиилэнэллэрин туһугар ахсаабакка үлэлиэхтээх. Маныаха үүнэр көлүөнэни үөрэтиигэ сиэр-майгы уонна култуурунай иитии быһаарар суолталаах.
Саха сирин педагогтара бэйэлэрин үрдүк сыалларын-соруктарын чиэстээхтик толороллор диэн сыаналыыбын. Ону үөрэнээччилэр Бүтүн Россиятааҕы уонна норуоттар икки ардыларынааҕы предметнэй олимпиадаларга үрдүк ситиһиилэниилэрэ туоһулуур.
Бу бэлиэ күҥҥэ өрөспүүбүлүкэ үөрэҕин систиэмэтин атаҕар туруорууга бэйэлэрин кылааттарын киллэрбит бэтэрээн педагогтарга уруй-айхал этэбит. Өр сыллаах үтүө суобастаах үлэлэрин, үрдүк маастарыстыбаларын, дойду дьоһуннаах гражданнарын иитэн таһаарбыттарын иһин махталбын тиэрдэбин. Өрөспүүбүлүкэбитигэр көлүөнэлэр утумнаһыылара – учууталлар дьиэ кэргэн династиялара баара кэрэхсэбиллээх суол.
Ытыктабыллаах учууталлар! Ис сүрэхпиттэн эһиэхэ доруобуйаны, этэҥҥэ буолууну, дьолу-соргуну, үлэҕитигэр ситиһиилэри баҕарабын! Иҥэрбит билиигит сыдьаайа үөрэнээччилэргит олохторун суолун сырдаттын уонна олоххо тардыһыыга кынаттаатын!
Саха Өрөспүүбүлүкэтин Ил Дархана Егор Борисов
