Саха сирин күндү олохтоохторо! Саха Өрөспүүбүлүкэтин салалтатын уонна тус бэйэм ааппыттан Төрөөбүт тыл уонна сурук-бичик күнүнэн эҕэрдэлиибин!
Олунньу 13 күнүгэр уһулуччулаах лингвист, сахалыы суругу-бичиги төрүттээччи, саха бастакы букубаарын уонна начаалынай кылаастарга аналлаах үөрэх кинигэлэрин ааптара Семен Новгородов төрөөбүт күнүн бэлиэтиибит. Бу күн биһиги өрөспүүбүлүкэбитигэр олорор бары норуоттар төрөөбүт тылларын бырааһынньыгынан буолар.
Быйыл бу бырааһынньыгы 20-с төгүлүн бэлиэтиибит. Үгэс курдук төрөөбүт тыл декадатын чэрчитинэн өрөспүүбүлүкэ бары муннуктарыгар араас тэрээһиннэр ыытыллыахтара. Эгэлгэ тылынан үөрэтэр, сонуннары тарҕатар эйгэни салгыы сайыннарыыттан кэнэҕэски көлүөнэҕэ төрөөбүт култуурабытын, үгэстэрбитин чөл хаалларарбыт улахан тутулуктаах.
2016 сыл Россия Федерациятыгар Киинэ сылынан биллэрилиннэ. Национальнай киинэ индустриятын саҥа таһымҥа таһаарыы төрүт олохтоох норуоттар тылларын чөл хаалларарга уонна сайыннарарга саҥа кыахтары арыйыаҕа диэн эрэнэбин.
Саха сирин күндү олохтоохторо! Төрөөбүт тыл – бэйэбитин омук быһыытынан билиниибит төрдө, сиэр-майгы тирэҕэ, норуоппут духуобунай уонна матырыйаалынай баайын арыйар күүс буоларын өрүү өйдүөх тустаахпыт. Ис сүрэхпиттэн эһиэхэ уонна эһиги дьиэ кэргэттэргитигэр чэгиэн-чэбдик буолууну, или-эйэни баҕарабын!
Саха Өрөспүүбүлүкэтин
Ил Дархана Егор Борисов
