Дойду президенэ Владимир Путин уонна Саха сирин баһылыга Егор Борисов оробуочай көрсүһүүлэригэр элбэх боппуруоһу дьүүллэстилэр, ол иһигэр өрөспүүбүлүкэ социальнай-экономическай сайдыыта биир сүрүн миэстэни ылла.
Егор Борисов региоҥҥа быһыы-майгы хайдаҕын дойду баһылыгар билиһиннэрдэ. Оруобуна уон сыл аннараа өттүгэр, 2006 сыллаахха өрөспүүбүлүкэҕэ оҥорон таһаарар күүстэри, тырааныспары уонна энергиэтикэни кэлимсэ сайыннарыы 2020 сылга диэри болдьохтоох Схемата ылыллыбытын чиҥэтэн эттэ.
Ити түмүгэр социальнай-экономическай сайдыы үрдүк кирбиини ситиспит. Холобур, 2006-2015 с.с. регион ис валовай бородууктата 3,5 төгүл үрдээбит.
2007-2015 с.с. араас источниктартан 1,57 триллион солк. кээмэйдээх инвестиция түмүллүбүт. Уһук Илини тэтимнээхтик сайыннарыыга Саха сирэ биир сүрүн оруолу ыларын өрөспүүбүлүкэ баһылыга чиҥэтэн эттэ.
Бүгүн 2030 сылга диэри болдьохтоох социальнай-экономическай сайдыы Стратегията оҥоһулларын, ол олоххо киириитигэр 4,7 триллион солк. наадатын Егор Борисов ыйда.
Ил Дархан судаарыстыбаны салайыыга билигин туттуллар ньымалар (уруттаан сайыннарыы, регионнааҕы инвестбырайыактар, аналлаах инвестиционнай хантараактар, ураты экономическэй түөлбэлэр) өрөспүүбүлүкэ стратегическай суолталаах сыалын кэлимсэ толорорго ситэритэ суоҕун эттэ.
«Историческэй уопут көрдөрөрүнэн, регион өрө тахсыылаахтык, тэтимнээхтик сайдарыгар туспа быһаарыылар ылыллаллара ордук көдьүүстээх», — диир Егор Борисов.
Саха сирин баһылыга Россия бырабыыталыстыбата Саха сирин кэлимсэ сайыннарарга анаммыт уһун болдьохтоох докумуону оҥороругар Владимир Путин сорудахтыырыгар этии киллэрдэ.
Маннык докумуон оҥоһулларыгар уонна ылылларыгар 2022 сылга Саха автономията төрүттэммитэ 100 сыла улахан төрүөт буоларын Егор Борисов эттэ.
Президент өрөспүүбүлүкэ баһылыгын көҕүлээһинин сибидиэнньэҕэ ылла уонна РФ экономическай сайдыытын миниистирэ Алексей Улюкаев бу этиини ырытарыгар уонна бэйэтин этиилэрин киллэрэригэр эттэ.
