2018 сылга Дьокуускайга Саха Өрөспүүбүлүкэтин байыаннай-патриотическай иитиигэ киин тутуута саҕаланыа. Бу туһунан Ил Дархан Егор Борисов призывниктары түмэр өрөспүүбүлүкэтээҕи пууҥҥа буолбут мунньах кэмигэр эттэ.
Өрөспүүбүлүкэтээҕи призывниктары түмэр пуун 1956 сыллааҕы мас тутууга үлэлиир. Регион байыаннай хамыһаара Демир-оол Артын иһитиннэрбитинэн, дьиэни 1972 сыллаахха байыаннай комиссариат туһанарыгар биэрбиттэр, онтон 2015 сыллаахха объегы саахалланар туруктааҕынан билиммиттэр.
Егор Борисов казарманы уонна кабинеттары көрдө уонна усулуобуйата чахчы санитарнай-гигиеническай нуорманан призывниктар тохтуулларыгар сөп түбэспэтин бэлиэтээтэ. Сылын аайы призыв кэмигэр бу дьиэнэн 200 уол киирэн ааһар.
Архитектура уонна тутуу комплексын миниистирэ Вера Кузакова этэринэн, 2015 сыллаахха судаарыстыбаннай сакаас Сулууспатынан байыаннай-патриотическай иитиигэ киин тутуутугар икки бырайыак оҥоһуллубут. Бастакыта таас варианынан, иккиһэ — чэпчэки конструкциянан. Былаан быһыытынан, призыв пууна ол Киин иһинэн, атын патриотическай хабааннаах кулууптары уонна патриотическай хайысхалаах уопсастыбаннай тэрилтэлэри кытта тэҥҥэ киириэхтээх. Бастакы этээс дьаһалта-бытовой, ол эбэтэр медик хоһо, призывниктар кэтэр таҥастарын, формаларын уурар ыскылааттар, патриотическай кулууптар кабинеттара. Иккис уонна үһүс этээстэргэ призывниктар казармалара.
Борисов дьиэни таас варианынан тутары эттэ: «Тутууну этааптарга арааран ыытыҥ, судаарыстыбаннай-чааһынай бииргэ үлэлээһин механизмын туттуҥ. 2018 сылга саҕалааҥ«.
Билигин баар дьиэҕэ капитальнай өрөмүөн ыытыытын боппуруоһа турар. Ил Дархан өрөспүүбүлүкэ бырабыыталыстыбатыгар капитальнай өрөмүөнү ыытыыга ылыллыахтаах миэрэлэри от ыйын 1 күнүгэр диэри чуолкайдыылларыгар, онтон салгыы балаҕан ыйын 1 чыыһылатыгар диэри өрөмүөн үлэтин бүтэрэргэ сорудах биэрдэ.
Маны сэргэ субъект салайааччыта призывниктары түмэр пууннаах СӨ байыаннай-патриотическай иитиигэ киин тутуутун үбүлээһинин судаарыстыбаннай бюджекка 2017 сылга уонна былааннаах 2018-2019 сылларга көрөллөрүгэр эттэ.
Егор Борисов призывниктары кытта көрүстэ. Билигин пууҥҥа Россия сэбилэниилээх күүстэригэр байыаннай сулууспаны ааһарга бэлэм 47 эдэр киһи баар. Ил Дархан уолаттарга Ийэ дойдуларын дьиҥнээх көмүскээччи буолалларыгар, ытык иэстэрин дьоһуннаахтык толорон кэлэллэригэр баҕа санаатын тириэртэ.
