Саха сирин баһылыга Егор Борисов сэтинньи 8 күнүгэр РФ Судаарыстыбаннай сэбиэтин консультативнай хамыыһыйатын мунньаҕар кыттар. Мунньаҕы РФ президенын көмөлөһөөччүтэ Игорь Левитин салайан ыытар.
Ил Дархан мунньахха ситэриилээх былаас нэһилиэнньэ иннигэр оҥорор отчуотун ыытыы уопутун федеральнай киин таһымыгар билиһиннэриэ. Бу тэрээһин көдьүүстээҕин дойдуга бүтүннүүтүгэр билиммиттэрэ.
Отчуот саҥа көрүҥэ Саха сиригэр эрэ оҥоһуллар. Маны өрөспүүбүлүкэ бастакы президенэ Михаил Николаев бастаан олоххо киллэрбитэ. Уустук кэмҥэ нэһилиэнньэни кытта быһа сибээһи олохтообута.
Баһылык көмөлөһөөччүтэ Станислав Платонов этэринэн, Егор Борисов бэйэтин үлэтигэр дьон-сэргэ санаатыгар тирэҕирэр. Манна улахан болҕомто дьон кыһалҕатыгар ууруллар.
Ону таһынан Ил Дархан сорудаҕынан отчуот кэмигэр киирбит кыһалҕаҕа сыһыаннаах этиилэргэ сыһыары тутуллан бырабыыталыстыба уонна муниципальнай тэриллии сөбүлэһиилэри түһэрсэллэр.
