Нуучча театрыгар Ил Дархан Егор Борисов талааннаах оҕолору кытта көрүстэ. Оҕолор оҥорбут быыстапкаларын сиһилии көрдө уонна хас биирдиилэрин кытта кэпсэттэ. 


Егор Борисов ордук тоһоҕолоон технология сайдыытыгар туһаайыллыбыт бырайыактары көрдө. Хас да оҕо космоһы баһылааһыҥҥа оҥорбут үлэлэрин билиһиннэрдилэр. Республика хас да оройуонугар оскуола үөрэнээччилэрэ сир шарын тулалыыр салгын бүрүөтүн уонна космоһы чинчийиигэ туттуллар датчиктары угар кыра капсулалары оҥороллорун кэпсээтилэр. Өктөмнөөҕү научнай-үөрэтэр киин уһуйуллааччылара учууталларын кытта  500 м үөһэнэн көтөр ракеталары хаһыс да сылын оҥороллорун көрдөрдүлэр. Бу оҕолор Ил Дархаҥҥа инникитин космоһы үөрэтиигэ инженер-механик буолуохтарын баҕаралларын эттилэр.

Бүлүү 1 №-дээх орто оскуолатын ахсыс кылааһын үөрэнээччитэ Владислав Малышев мастан уонна хордуонтан оҥорбут «Союз» хараабыл комплексын мадьыала интэриэһинэйдик көһүннэ.

Егор Борисов Сунтаар улууһун Тойбохой оскуолатын онус кылааһын үөрэнээччитэ Александр Яковлев дьиэ тэллэйин ыраастыырга оҥорбут тэрилин патенныырыгар көмөлөһөллөрүгэр эттэ. Эдэр чинчийээччи быһаарарынан, бу тыа сиригэр олус наадалаах айан оҥоруу ультрафиолетовай сардаҥалар ньымаларынан үлэлиир.

Гуманитарнай чинчийээччилэртэн Баһылык болҕомтотун эдэр пушкинист, Кэбээйи улууһун Ньидьилитээҕи оскуола иккис кылааһын үөрэнээччитэ Матвей Данилов ылла. Кини бэйиэт олоҕун уонна айар үлэтин олус истиҥник кэпсээтэ.

Бэрдьигэстээхтэн кэлбит Влада Кузнецова тротуар билииккэтин оҥорууга чох булкадыһыгын туттууну кэпсээбитин Ил Дархан сэҥээрдэ. Итиэннэ кыыс быыстапкаҕа туруорбут «Саха сирин эдэр олохтоохторо» куоратын макетын Егор Борисов баар бырайыактарга сэмсэ туталларыгар ыйда.

Бэйэлэрин талааннарын балериналар, музыканнар, худуоһунньуктар, эдэр агрономнар уонна да атыттар көрдөрдүлэр.

«Биһиги түргэн уонна сөптөөх быһаарыылары ылар ыччаты иитэн таһаарыахтаахпыт. Бүгүҥҥү быыстапкаҕа сылдьан мин оннук оҕолор баалларыгар итэҕэйдим. Бары эйгэни хабар өссө элбэх талааннаах оҕо баар буолуохтаах. Билигин уон сыл иһигэр өрөспүүбүлүкэбит сайдыытыгар күүстээх хардыыны оҥоруохтаахпыт. Биһиги оҕолорбутун ылбыт билиилэрин туһаҕа таһаарар гына иитиэхтээхпит. Оччоҕо эрэ цифровой экономикаҕа киирсэн, саҥа технологиялары баһылыахпыт. Ол инниттэн талааннары арыйан иһиэхтээхпит. Онно төрөппүт, уопсастыба уонна былаас бииргэ үлэлиэхтээхпит«, — диэн Ил Дархан мустубут дьоҥҥо, оҕолорго туһаайан эттэ.

Ил Дархан оҕолору кытта атах тэпсэн олорон кэпсэттэ. Киниэхэ үөрэх туйгуннара уонна араас таһымнаах олимпиада кыайыылаахтара, тэрээһин модератордара Егор Аргунов, София Копылова, Алексей Старостин уонна Яна Медведева көмөлөстүлэр.

Сигэн:

0
0

Хоруй суох

Хоруйдаа

Лимит времени истёк. Пожалуйста, перезагрузите CAPTCHA.