Егор Борисов массыына ырыынагын сабарга уонна куораты иилии барар суолга баар сокуоннайа суох тутуулары көтүрэргэ сорудахтаата

0
90

Дьокуускай куораты иилии барар суолга баар сокуоннайа суох тутуулар тула сөптөөх уонна хорсун быһаарыылар ылыллыахтара. Ити туһунан өрөспүүбүлүкэ баһылыга Егор Борисов сорудахтаата. Ону таһынан массыына атыыланар ырыынагын атын сиргэ көһөрүөхтэрэ.


Егор Борисов куорат эбийиэктэрин кэрийэн көрө сылдьан Жорницкай аатынан уулусса уонна куораты эргийэ барар суол быһа охсуһууларыгар болҕомтотун уурда. Манна тупсарыы үлэтэ ыам ыйыттан ыла саҕаланыахтаах уонна алтынньыга түмүктэниэхтээх. Суоллар быһа охсуһууларыгар суол болотунатын 100 м уһун суол түөрт балаһаҕа диэри кэҥэтиэхтэрэ.

суол0

Куораты иилиир суолга сокуоннайа суох тутуулар баһылык болҕомтотун үөһүгэр турдулар. Ону таһынан массыына ырыынага эргиччи мэһэйи үөскэтэрин кини ойуччу тутан бэлиэтээтэ.

«Атыылаһааччыларга, атыылааччыларга да бу ырыынак табыгаһа суох миэстэҕэ турар. Төһө кыалларынан түргэнник мантан суох оҥоруохтаахпыт», — диэтэ кини.

Дьокуускэй мээрэ Айсен Николаев этэринэн, массыына ырыынагын сирэ-уота бас билээччилээх, онон куорат дьаһалтата ыл да, былдьыыр кыаҕа суох. Куораты эргийэ  барар суолга баар учаастактарга эмиэ итиниэхэ майгынныыр быһыы-майгы үөскээбит. Сир учаастактара 2000-с сылларга оҕуруоту үүннэрэргэ, кэтэх дьиэни туттарга анаан бэриллибиттэр. Дьиҥэр, бу сирдэр аналынан тутуллубаттар. Оҕуруоттар, дьиэлэр оннуларыгар автосервистэр, атыы-эргиэн павильоннара, о.д.а. коммерческай тутуулар бааллар. Бас билээччилэр олоххо суох дьиэлэргэ, оҕуруоттарга көҥүлү ылбыттар. Ол иһин сири былдьаан ылыы юридическэй өттүнэн судургута суоҕун мээр эттэ.

суол1

«Суут быһаарыыта суох олбуору ылан көтүрэн кэбистэхпитинэ, суут, борокоротуура бас билээччи диэки буолаллара чуолкай. Ону таһынан биһиэхэ административнай ыстараабы, бас билээччигэ толуйуу харчытын төлүүргэ күһэйиэхтэрэ », — диир мээр.

Ол да буоллар куорат дьаһалтата сокуоннайа суох тутуулары утары көдьүүстээхтик үлэлиир. Бүгүҥҥү туругунан 40 эбийиэккэ тэриллибит дьыалалары кыайбыттар. Куораты иилии барар суол тула сирдээх-уоттаах дьону булан салгыы үлэни ыытарга Егор Борисов сорудахтаата. Кини сокуоннайа суох тутуллубут эбийиэктэри көтүрэргэ диэри хорсун быһаарыылары уталыппакка ылар наадатын ыйда.

суол2

«Сир аналынан туттуллуохтаах. Атын сыалга туттуу куораты тутуу кодексатынан бобуллар. Бу эбийиэктэр олбуордарын бульдозерынан күрдьүҥ. Сокуону кэспит дьон бэйэлэрэ сууттастынар. Бэрээдэк куоракка халбаҥнаабаттык киириэхтээх», — диэтэ кини.

 

0
0

Хоруй суох

Хоруйдаа