Саха сирин баһылыга Егор Борисов Россиятааҕы ДОСААФ өрөспүүбүлүкэтээҕи салаатын, байыаннай-патриотическай кулууптар салайааччыларын уонна техническэй спорт көрүҥнэрин бэрэстэбиитэллэрин кытта көрүстэ.
Егор Борисов ДОСААФ автодромугар байыаннай «Виллис» массыынаны ыытан киирдэ. Кини кэнниттэн 2 КАМАЗ, 2 ЗИЛ, бронетранспортер, о.д.а тиэхиньикэ колонната субулунна. Космоска киһи аан бастаан көппүтүн бэлиэтиир тэрээһиҥҥэ стройдааһын туһунан РФ ДОСААФ регионнааҕы салаатын салайааччыта Сергей Черных иһитиннэрдэ.
Эҕэрдэ кэнниттэн Егор Борисов «Участнику борьбы со стихией на Амуре» мэтээли рядовой, суоппар-механик Игорь Лебедевка үөрүүлээх быһыыга-майгыга туттарда.
Мотоспортсменнар, дрифтердар, быыһааччылар нүөмэрдэрин, авиакулууп көтөр аппарааттарын, тиэхиньикэни, спортивнай массыыналары, сэп-сэбиргэл хаартысканан быыстапкатын көрдүлэр-иһиттилэр.
Тэрээһин чэрчитинэн ДОСААФ уонна байыаннай-патриотическай кулууптар үбүлэниилэригэр анаммыт мунньах буолла. Онно Егор Борисов попечительскэй сэбиэти олохтуур туһунан эттэ, ити сэбиэти кини тус бэйэтэ иилиэҕэ-саҕалыаҕа. Үбүлээһин боппуруоһугар үүнэр көлүөнэ фондатын тардар санаа баарын эттэ.
Көрсүһүү түмүктэниитэ үөрүүлээх тэрээһин кыттыылаахтара хаартыскаҕа түстүлэр, саллаат хааһытын сиэтилэр.
