Үлэ иһин төлөбүр, оҕону оскуолаҕа суруйтарыы, тутуу салаатын кыһалҕалара, о.д.а. ыйытыктары дьон-сэргэ Егор Борисовка биэрдэ.
«Фтизиатрия» НПЦ санитарката Наталья Иванова РФ президенигэр суругар балыыһа алын персоналыгар хамнас олус намыһаҕын үҥсүбүт. Кини суругар ыйар быһыытын-майгытын сирийэн ырытыы түмүгэр биллибитинэн, сыл аҥаарыттан ордук үлэлиир Иванова хамнаһа 24 тыһ. солк. эбит.
«Биһиги баар докумуоннары барытын бэрэбиэркэлээбиппит. Тохсунньуга Иванова туох да төрүөтэ суох үлэтигэр тахсыбатах. Ол иһин хамнаһын көҕүлүүр эбиллиитэ бэриллибэтэх. Ити түмүгэр кини 18 тыһ.солк. ылбыт», — диэн доруобуйа харыстабылын миниистирин солбуйааччы Людмила Вербицкая эттэ.
«Өрөспүүбүлүкэҕэ бүгүн алын хамнас ииттинэн олоруу алын кээмэйиттэн итэҕэһэ суох. Кырдьык, киһи барыта билигин үрдүк хамнастаах диир кыахпыт суох. Бюджет эйгэтин үлэһиттэригэр хамнаһы үрдэтиигэ дуона суох хамнастаахтарга ураты болҕомто ууруллар. Медицинэ бу тэрилтэтигэр үлэ төлөбүрэ хайдах үөскэтиллэрин, ааҕылларын булгуччу бэрэбиэркэлиэхпит», — диэтэ Борисов.
Дьокуускай олохтооҕо Александра Платонова оҕону бастакы кылааска суруйтарыыга олунньу саҥата сорох оскуолаларга арааллаан-айдаан бөҕө тахсыбыта. Платонова этэринэн, кини оҕото пропискатынан куораттааҕы классическай гимназияҕа киириэхтээх, ол эрээри сайабылыанньа элбэҕиттэн кини ити оскуолаҕа тиксибэт балаһыанньата үөскээбит.
Куорат баһылыгын солбуйааччы Евдокия Евсикова эппитинэн, оскуолаҕа суруйтарыы саҕаланарын саҕана үгүс төрөппүттэр бу микрооройуоҥҥа регистрацияламмыттар. Ол иһин, үөрэнээччи ахсаана оскуола кыаҕар сөп түбэспэт буолбут. 70 миэстэҕэ уопсайа 120 сайабылыанньа баар. Эбии кылааһы аһар туһунан кэпсэтии билигин бара турар. Ону таһынан мээрия оҕолору оскуолаҕа ылыы бэрээдэгэр анаммыт регламены бэлэмнии сылдьар.
«Маннык регламент наада уонна куорат оскуолаларыгар барыларыгар дьайыахтаах», — диэтэ Егор Афанасьевич.
Ити курдук, приемҥа кэлбит дьон араас ис хоһоонноох ыйытыктарыгар сиһилии хоруйу ыллылар.
