Үөрэх, билии күнүгэр Саха сирин баһылыга Егор Борисов Сылаҥ нэһилиэгин Улахан-Күөл оскуолатын үөрэнээччилэрин эҕэрдэлээтэ уонна Чурапчытааҕы гимназия үөрүүлээх аһыллыытыгар сырытта. Ити туһунан кини бэйэтин Instagram аккаунугар суруйар.
Егор Борисов саҥа аһыллыбыт үөрэх тэрилтэтэ кини таайын Степан Кузьмич Макаров аатын сүгэрин, кини таайа хорсун быһыы, санаа күүһүн уонна эппиэтинэстээх буолуу холобурунан буоларын ыйар.
«Степан Кузьмич Макаров Аҕа дойду Улуу сэриититтэн икки атаҕа суох эргиллэн кэлбитэ, 27 саастааҕар инбэлиит буолбута. Төһө да ыарахан эчэйиилээҕин иһин, олоҕу үрдүк көхтөөхтүк олорбута. Кини оскуолаҕа история уруогун үөрэтэрэ, олоҕун бүтүннүүтүн оҕолорго анаабыта. САССР уонна РСФСР үтүөлээх учууталын ааттары ылбыта», — диир Егор Борисов.
Кини эппитинэн, быйыл өрөспүүбүлүкэ араас муннуктарыгар уопсайа 14 саҥа оскуола аанын аһар. «Үбү-харчыны инникитин да үөрэххэ ыытыахпыт. Саҥа оскуола – култуура саҥа таһыма. Оттон хайа баҕарар сайдыы төрдө култуураҕа сытар», — диир кини.
Егор Борисов Билии күнүнэн эҕэрдэлээтэ. «Балаҕан ыйын 1 күнэ — киһи өйүгэр-санаатыгар, сүрэҕэр-дууһатыгар иҥэн хаалар, үөрүүлээх күн. Үөрэх бастакы күнүгэр доҕотторбун, бииргэ үөрэнэр табаарыстарбын, учууталларбын көрсөөрү сүүрэрбин бу баардыы өйдүүбүн. Онон кыратык симиттибит, ол эрээри дууһаларыгар үөрбүт-көппүт, дьоллоох оҕолору өйдүүбүн», — диэн кини суруйар.
